Uyghur élining jenubiy rayonlirida "qosh til" yesliliri köpeymekte

Tengritagh torining 16 - iyun bergen xewerde körsitilishiche, hazirgha qeder yéngisheher nahiye tewesidiki 50 yézigha 82 qosh til yeslisi qurulup, qosh tili sinipliri 116ge, bu siniplarda oquwatqan xitay bolmighan balilarning sani besh minggha yetken.

Melum bolushiche, bu xil oquwatqan oqughuchilarning sani pütün nahiye tewesidiki yesli yéshidiki balilarning 40 pirsentini teshkil qilidiken.

Ötken yili dékabirda tengritagh axbarat tori, Uyghur élide "qosh til "siniplirining 5minggha, oqughuchilarning sani 150 minggha yetkenlikini xewer qilghan hemde xitay hökümitining qosh tili sinip da'irisini "bashlan'ghuch mekteptin, yeslilerge, yézilardin kentlerge kéngeytish" istratégiysini we kelgüsi besh yil ichide, aqsu, qeshqer wilayetliri we ili qazaq aptonom oblasti qatarliq 7 wilayet oblastlar we 56 nahiyide 1009 "qosh til" sinipi qurush, 2010- yiligha kelgende 258 ming neper xitay bolmighan oqughuchilarni yeslidin bashlapla xitayche oqutush qurulushi üchün Uyghur aptonom rayonning 430 milyon yüen meblegh ajratqanliqini ashkarilighan.

Xitaylar "qosh tili" ma'aripini Uyghur élidiki xitay bolmighan milletlerning ma'arip sapasini östürüsh we namratliqtin qutulush yoligha élip mangidu dep süpetlep kéliwatqan bolsimu, emma chet ellerdiki Uyghur ziyaliylar xitaylarning atalmish "qosh tili" istiratégiyisi Uyghurlar we bashqa xitay bolmighan milletlerning milliy kimlikini ajizlashturup , ularni xitaylargha assimilyatsiye bolup kétish yoligha élip mangidu dep qarashmaqta.(Jüme)