Ürümchi qosh tilliq ma'arip boyiche xelq'araliq muhakime yighini échildi

28- Iyul küni ürümchide xelq'araliq qosh tilliq ma'arip ilmiy muhakime yighini échilghan bolup, bu yighin'gha xitay, yaponiye, koriye, mongghuliye, türkiye, özbékistan, qirghizistan, qazaqistan qatarliq döletlerning alimliri ishtirak qilghan.

Xitay axbarat wasitilirining uchurliridin qarighanda, bu qétimliq xelq'araliq yighinni xitay az sanliq milletler qosh tilliq ma'arip tetqiqat jem'iyiti, shinjang uniwérsitéti we Uyghur aptonom rayonluq til yéziq komitéti qatarliq orunlar birliship achqan bolup, bu Uyghur élide échilghan tunji qétimliq xelq'araliq qosh tilliq ma'arip mesilisige a'it muhakime yighini bolup hésablinidiken.

Yighinda asasliqi qosh tilliq ma'aripning 21-esirdiki tereqqiyat mesililiri we yönilishi shuningdek qosh tilliq ma'arip nezeriyisi we usulliri muhakime qilin'ghan. Xewerdin qarighanda, xitay az sanliq milletler qosh tilliq ma'arip tetqiqat jem'iyitining bashliqi ding wénlo " Uyghur élide qosh tilliq ma'aripni tézlikte rawajlandurush shinjangning iqtisadi we jem'iyet tereqqiyatini tézlitidu we ottura asiya hem etraptiki döletlerge yaxshi tesir peyda qilidu" dep tekitligen.

Biraq, Uyghur pa'aliyetchilirining qosh tilliq ma'arip siyasiti heqqidiki köz qarishi bashqiche bolup, dunya Uyghur qurultiyining bayanatchisining qarishiche, xitayning qosh tilliq ma'aripi dégini emeliyette bir tilliq yeni xitay tilliq ma'ariptin ibaret bolup, bu bara-bara Uyghur tilining rolini we Uyghur medeniyitini yoqitishni meqset qilidu. (Ümidwar)