Qosh til ma'arip xelq'ara ilmiy muhakime yighini ürümchide ötküzüldi

Xitay hökümiti, Uyghur élide yolgha qoyuwatqan qosh til ma'arip siyasitini izchil kücheytmekte.

Xitay axbarat wastilirining yéqinda élan qilghan xewerliridin melum bolushiche, 5 ‏- qétimliq qosh tilliq ma'arip xelq'ara ilmiy muhakime yighini ürümchide échilghan bolup, yighin xitay az sanliq milletler qosh tilliq oqutush tetqiqat jem'iyiti, shinjang uniwérsitéti we Uyghur aptonom rayonluq milletler ishliri komitéti teripidin ötküzülgen, mezkür yighin Uyghur aptonom rayonda tunji qétim échilghan qosh tilliq ma'arip xelq'ara ilmiy muhakime yighini hésablinidiken.

Qosh tilliq ma'arip we inaq jem'iyet berpa qilish dégen shu'ar bu qétimqi yighinning asasiy témisi bolup, yighinda yene, 21 ‏- esirdiki qosh tilliq ma'aripning tereqqiyat alahidiliki we yüzlinishi, qosh tilliq ma'arip neziriyisi shuningdek usuli qatarliq mesililer xitayning ichi we sirtidin kelgen mütexesisisler teripidin muhakime qilin'ghan.

Xitay hökümiti, Uyghur élide " qosh til " ma'aripini yolgha qoyushni teshebbus qilip, aliy, ottura mekteplerde hetta bashlan'ghuch mekteplerde mezkür ma'arip tüzülmisini yolgha qoymaqta. Közetküchilerning éytishiche, gerche " qosh til " ma'aripi déyilgen bolsimu , emma qosh tilining yene biri hésablan'ghan Uyghur tili nöwette Uyghur ma'aripida nahayiti az qollinilmaqta hetta , pütünley yoq bolup kétish xewpke duch kelmekte iken.

Merkizi gérmaniyidiki dunya Uyghur qurultiyining bayanatchisi dilshat réshit ependining tekitlishiche, xitay da'iriliri " qosh til ma'aripi" dep chirayliq nam astida, peqet bir til qollinishni, yeni xitayda hökümran til hésablan'ghan xitay tilini qollinishni shert qilghan bolup, bu xitay chong milletchiliki bolupmu , xitay bolmighan milletlerni yoq qilish siyasitini ishqa ashurushni meqset qilghan iken. (Eqide)