Хитай һөкүмити"қош тил" маарипини йәслиләргичә кеңәйтмәктә


2008.01.07

Қағилиқ наһийиси һөкүмәт хәвәрләр торида көрситишичә, һазир қағилиқ наһийиси "қош тил "йәслилиригә ашкара оқутқучи қобул қишни башлиған болуп, бу хитай һөкүмитиниң уйғур елидә йүргүзүватқан "қош тил" маарипиниң қәдимини йәслиләргичә кеңәйтиватқанлиқиниң дәлилидур.

Хәвәрдин мәлум болушичә, қағилиқ наһийиси һазир йезиларда қош тил йәслилирини қоруш хизмәт гурупписи тәшкиллигән болуп, улар 2007- йили 12 ‏- айдин башлап тәйярлиқ хизмәтлирини ишләшкә башлиған вә җәмийәттин 60 нәпәр "қош тил "йәслиси оқутқучиси қобул қилидиғанлиқи һәққидә уқтуруш чиқарған.

Хәвәрдин ашкарилинишичә "қош тил" йәсли хизмәт орниға 141 нәпәр киши өзини тизимлатқан болуп, буларниң 64 нәпири хитай, 77 нәпири уйғур, намзатлар хитай тилиниң нәзирийиси, илим-пән билимлири, асасий маһарәт вә педагогика қаидилири буйичә пүтүнләй хитай тилида емтиһан бәргән.

Һазир хитай һөкүмити уйғурлар әң топлишип олтурақлашқан район: қәшқәр вилайити тәвәсидә "қош тил" маарипини йәслидин башлап елип бериш хизмитини күчәйткән болуп, тәңритағ торида берилгән хәвәрдә көрситилишичә, 2000- йилидин буян қәшқәр тәвәсидә "қош тил" йәслисидин 444 си қурулуп, оқуғучи сани 63 миң 416 гә йәткән.

Уйғур или миллий маарипи саһәсидә көрүлүватқан бу һал дуняниң һәрқайси җайлиридики уйғурларни қаттиқ әндишигә селиватқан болуп, һазир норвегийидә яшайдиған бир уйғур зиялийниң билдүрүшичә, хитай һөкүмити йүргүзүватқан аталмиш "қош тил" маарипи әмәлийәттә хитай тилини асас қилидиған йәк тил маарипи болуп, буниң кәлгүсидә уйғурларниң миллй кимликигә елип келидиған тәһдитини мөлчәрләш интайин қейин икән. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.