Xitay hökümiti"qosh til" ma'aripini yeslilergiche kéngeytmekte

Qaghiliq nahiyisi hökümet xewerler torida körsitishiche, hazir qaghiliq nahiyisi "qosh til "yeslilirige ashkara oqutquchi qobul qishni bashlighan bolup, bu xitay hökümitining Uyghur élide yürgüzüwatqan "qosh til" ma'aripining qedimini yeslilergiche kéngeytiwatqanliqining delilidur.

Xewerdin melum bolushiche, qaghiliq nahiyisi hazir yézilarda qosh til yeslilirini qorush xizmet guruppisi teshkilligen bolup, ular 2007- yili 12 ‏- aydin bashlap teyyarliq xizmetlirini ishleshke bashlighan we jem'iyettin 60 neper "qosh til "yeslisi oqutquchisi qobul qilidighanliqi heqqide uqturush chiqarghan.

Xewerdin ashkarilinishiche "qosh til" yesli xizmet ornigha 141 neper kishi özini tizimlatqan bolup, bularning 64 nepiri xitay, 77 nepiri Uyghur, namzatlar xitay tilining neziriyisi, ilim-pen bilimliri, asasiy maharet we pédagogika qa'idiliri buyiche pütünley xitay tilida émtihan bergen.

Hazir xitay hökümiti Uyghurlar eng topliship olturaqlashqan rayon: qeshqer wilayiti teweside "qosh til" ma'aripini yeslidin bashlap élip bérish xizmitini kücheytken bolup, tengritagh torida bérilgen xewerde körsitilishiche, 2000- yilidin buyan qeshqer teweside "qosh til" yeslisidin 444 si qurulup, oqughuchi sani 63 ming 416 ge yetken.

Uyghur ili milliy ma'aripi saheside körülüwatqan bu hal dunyaning herqaysi jayliridiki Uyghurlarni qattiq endishige séliwatqan bolup, hazir norwégiyide yashaydighan bir Uyghur ziyaliyning bildürüshiche, xitay hökümiti yürgüzüwatqan atalmish "qosh til" ma'aripi emeliyette xitay tilini asas qilidighan yek til ma'aripi bolup, buning kelgüside Uyghurlarning milly kimlikige élip kélidighan tehditini mölcherlesh intayin qéyin iken. (Jüme)