Уйғур елидики қош тиллиқ оқутқучиларни тәрбийиләш хизмити башланди


2007.03.04

Шинҗаң учур ториниң ашкарилишичә, уйғур аптоном райони бойичә аз санлиқ милләт қош тиллиқ оқутқучилирини икки йиллиқ муддәт билән тәрбийиләш хизмити рәсмий иш башлиған.

Хәвәрдә ейтилишичә, бу хизмәт алди билән үрүмчидики шинҗаң маарип институтида башланған болуп, пүтүн уйғур ели бойичә 11 алий мәктәп мәзкур хизмәтни зиммисигә алған. Бу 11 алий мәктәпниң сәккизи үрүмчигә җайлашқан икән.

Хитайниң икки йиллиқ муддәт бойичә қош тиллиқ оқутқучиларни тәрбийиләш пилани яш чәклимиси 35 яштин төвән болған, хитай әмәс милләттин келип чиққан оттура -башланғуч мәктәп оқутқучилириға қаритилған.

Уйғур елида қош тиллиқ оқутуш синақ тәриқисидә йолға қоюлушқа башлиғандин буян хитай һөкүмити зор миқдарда мәбләғ аҗритип, оқутқучиларни хитай тилида дәрс өтәләйдиған қилип тәрбийиләшкә башлиған. Уйғур аптоном райони 2007-йилидин 2014-йилиғичә икки йиллиқ муддәт билән 13500 оқутқучини қош тиллиқ қилип тәрбийиләшни пиланлиған болуп, учурлардин қариғанда, уйғур вә башқа аз санлиқ милләт мәктәплиридә қәдәмму-қәдәм пүтүнләй хитай тилида дәрс өтүлүш мәқсәт қилинған икән.

Уйғур маарип мутәхәсислириниң ейтишичә, уйғур елидә ейтиливатқан қош тиллиқ маарип әмәлийәттә бир тиллиқ йәни пәқәт хитай тиллиқ маарипидин ибарәт болуп, уйғур тилидики маарип әмәлдин қалдурулуп, униң орниға хитай тили маарипи дәсситилиш мәқсәт қилинған маариптин ибарәт икән . (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.