Турпанда қуш зукам вируси байқалди


2008-01-04
Share

Әҗәллик H5N1 типлиқ қуш зуками вируси байқлған турпанниң хәритидики көрүнүши. RFA Photo >> Хәритиниң чоңайтилған көрүнүши

Хитай дөләтлик қуш зукам вируси тәҗрибиханиси уйғур аптоном райониниң турпан шәһири идиқут йоли иш башқармисиниң үзүмзар аилиликләр районидики тохуларда байқалған кесәлликниң H5N1 типлиқ әҗәллик қуш зукам вируси икәнликини җакарлиди.

2007 - Йили 12 - айниң 29 - йили идиқут йоли аилиликләр районидики бир шәхсиниң тохулири туюқсиз өлүп кәткәндин кейин, бу вәқә мунасивәтлик органларниң диққитини қозғиған. Дөләтлик қуш зукам вируси тәҗрибиханиси 3 - январ күни тохуларниң әҗәллик қуш зукам вирусида өлгәнликини муқимлаштурди.

Идиқут йоли иш башқармисидики хадимларниң радиомизға әскәртишичә, мунасивәтлик йәрлик даириләр вәқә йүз бәргән районларда өй қушлирини өлтүрүш һәрикити елип бармақта. Идиқут иш башқармисиниң исмини ашкарилашни халимайдиған бир хадими, турпан шәһәр башлиқиниң вәқә йүз бәргән җайға барғанлиқини, өй қушлирини өлтүрүшкә қатнашқан кишиләргә саламәтлик тәкшүрүши елип бериливатқанлиқини билдүрди.

Хәвәрләргә қариғанда һазирға қәдәр 4850 өй қуши өлгән болуп, 29383 өй қуши өлтүрүлгән. Лекин бу хадим, зукам вируси байқалған райондики тухулар билән йеқиндин учрашқан адәттики пуқраларға саламәтлик тәкшүрүши елип берилған яки берилмиғанлиқидин хәвәрсиз икән.

Бу турпан шәһиридә йеқинқи 2 йилдин бери 2 - қетим әҗәллик қуш зукам вирусиниң байқилишидур. Идиқут иш башқармисидики юқириқи хадим, һазирға қәдәр зукам вирусиниң адәмләргә юқуш әһвали байқалмиғанлиқини билдүрди.

Турпан шәһиридә қуш зукам вируси байқалғанлиқиға даир хәвәрләр уйғур илидики бәзи шәхсий йәрлик тор бәтлиридә тилға елинған болсиму, лекин җүмә күнигә қәдәр һөкүмәт мәтбуатлирида бу тоғрисида хәвәр берилмигән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт