Uyghur aptonom rayonining sanji oblastida qush zukam wirusi bayqaldi

Uyghur aptonom rayonining chöchek shehiri etrapidiki bir ghaz férmisida qush zukam wirusi bayqilish weqesidin kéyin, mezkur zukam wirusi emdi sanjidiki bir öy haywanliri férmisida bayqalghan.

Xitay yéza igilik ministirliqi seyshenbe küni sanjida qush zukam wirusi bayqalghanliqini dunya sehiye teshkilatigha melum qilghan.

Fransiye axbarat agéntliqining xewer qilishiche, qush zukam wirusi bayqalghan férmida 128 ghaz mezkur wirus bilen yuqumlan'ghan, hazirgha qeder 63 ghaz ölgen. Da'iriler mezkur pérmidiki 1500 toxu we ghazni öltürüwetken. B d t qarmiqidiki zira'et we yimek - ichmek orginining tekitlishiche, xitay yéza igilik ministirliqi zukam wirusining kontrol qilin'ghanliqini shundaqla hazirgha qeder ademlerge yuqush ehwali bayqalmighanliqini bildürgen.

Bu weqe Uyghur aptonom rayoni qush zukam wirusining yéqinqi 10 kün ichide 2 - qétim bayqilishi bolup hésablinidu. Mezkur wirus buningdin bir qanche kün ilgiri chöchek shehirining 30 kilométir nérisidiki bir ghaz férmisida bayqalghan. Da'iriler, chöchek shehiridiki öy haywanliri bazirini taqighan idi. "

"Washin'gton pochta géziti" ning xewer qilishiche, dunya sehiye teshkilati xitay hökümiti déhqanlarni ademlerge ishlitidighan anti- wirus dorisini qush zukam wirusigha qarshi haywanlargha ishlitishke terghip qilghan, dep gumanlinidiken. Xitay hökümiti seyshenbe küni "washin'gton pochta géziti" ning bu heqtiki xewirining toghriliqini ret qildi. Emma shundaqtimu yenila tekshürüsh élip baridighanliqini bildürdi. (Erkin)