Uyghur aptonom rayonida yene qush zukam wirusi bayqaldi


2005.11.15
Share on WhatsApp
Share on WhatsApp

Xitay yéza igilik ministirliqining seyshenbe küni ashkarilishiche, Uyghur aptonom rayonining poskam nahiyisi we ürümchi nahiyisi qatarliq ikki jayda xeterlik qush zukam wirusi bayqalghan.

Fransiye axbarat agéntliqining xewer qilishiche, bu ikki nahiyide hazirghiche 6547 toxu mezkur wirus bilen yuqumlan'ghan bolup, bularning 2747 si ölgen. Shinxu'a axbarat agéntliqining xitay yéza igilik ministirliqidin neqil keltürüshiche, bu ikki jaydiki qush zukam wirusi 9 - noyabirda bayqalghan. Bu qush zukam wirusining Uyghur aptonom rayonida yéqinqi 5 ay ichide 3 - qétim bayqilishi bolup hésablinidu.

Béyjing da'iriliri seyshenbe küni xitay boyiche nechche milyard öy qushigha waksina urudighanliqini jakarlidi. Waksinigha kétidighan pütün xirajetni hökümet üstige alidiken.

Bu yil 5 we 6 - aylarda Uyghur aptonom rayonining sanji we chöchek qatarliq jaylirida qush zukam wirusi bayqalghan bolsimu, emma xitay da'iriliri dunya sehiye teshkilati mutexessislirining bu rayonda tekshürüsh élip bérishigha yol qoymighan.

Xitay yéza igilik ministirliqi poskam bilen ürümchide qush zukam wirusi bayqalghanliqini élan qilghan bolsimu, Uyghur aptonom rayonida chiqidighan xitay metbu'atliri seyshenbe kün'giche bu toghrisida héchqandaq xewer bermidi. Peqet "tengri tagh" tori aptonom rayonda qush zukam wirusigha qarshi 3 téléfon liniyisi tesis qilin'ghanliqini xewer qilghan.

Ürümchi bilen poskamda qush zukam wirusi bayqilishitin ilgiri bu xil wirus enxuy, xunen, xubéy, lyawning we ichki mongghul qatarliq jaylarda bayqalghan . Shundaqla xunende 12 yashlardiki bir qiz bu késel sewebidin ölgen idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.