Xotende qush zukam wirusi bayqaldi

Xitay hökümiti ötken hepte Uyghur aptonom rayonining poskam we ürümchi nahiyiliride qush zukam wirusi bayqalghanliqini jakarlap uzun ötmey, peyshenbe küni xotende qush zukam wirusi bayqalghanliqini élan qildi. Shuning bilen birge mezkur wirus xubéydimu bayqalghan. Buning bilen qush zukam wirusi yéqinqi bir ay ichide xitay boyiche 13 jayda bayqalghan boldi.

Shinxu'a axbarat agéntliqining eskertishiche, xotende bayqalghan wirus xoten shehirining etrapida bayqalghan bolup, 32 qush mezkur wirus sewebidin ölgen. Xitay da'iriliri, xoten bilen xubéyda bayqalghan wirusning h5n1 tipliq wirus ikenlikini étirap qilghan.

Shinxu'a axbarat agéntliqi, xoten bilen xu béyda wirus bayqalghan jayning 3 kilométir etrapida yashaydighan barliq qushlarning öltürülgenlikini xewer qildi. Xotende 215,86 qush öltürülgen. Biraq shinxu'a axbarat agéntliqi, xotende mezkur wirusni yuqturuwalghan bolushi mumkin, dégen guman bilen közitish astigha élin'ghan ademler bar - yoqliqini tilgha almidi.

Buningdin bir kün ilgiri , xitay hökümiti enxuyda 24 yashlardiki bir ayalning qush zukam wirusi yuqturuwalghanliqini jakarlighan.

Dunya sehiye teshkilati bolsa, wirusning téximu köp ademge yuqush éhtimali barliqini chetke qaqmidi. Buning aldida 12 yashlardiki enxuylik bir qiz mezkur wirus bilen yuqumlinip ölgen. (Erkin)