Uyghur aptonom rayonida 4 - qétim qush zukam wirusi bayqaldi

Xitay da'iriliri jüme küni Uyghur aptonom rayonida ürümchi nahiyisi, poskam we xotenlerdin kéyin, aptonom rayonning merkizi ürümchide yéngidin qush zukam wirusi bayqalghanliqini jakarlidi. Bu, qush zukam wirusining Uyghur aptonom rayonida yéqinqi ikki hepte ichide 4 - qétim bayqilishi bolup hésablinidu.

Shinxu'a axbarat agéntliqi, zukam wirusining ürümchi bilen birge shenshidimu bayqalghanliqini xewer qilip, xitay boyiche qush zukam wirusi bayqilish weqesining 19 gha yetkenlikini élan qildi.

Xitay da'iriliri bu heptining bashliri zukam wirusi öy qushliri bilen yéqindin hepileshken ikki ademde bayqalghanliqini étirap qilip, buning ichidiki 12 yashliq bir qizning mezkur wirus tüpeylidin ölgenlikini jakarlighan idi.

Dunya sehiye teshkilati bolsa, xitay da'irilirini jiddiy agahlandurmaqta. Mezkur teshkilatning béyjingda turushluq bayanatchisi wadiya buning xitayda tarqilishidin "heyran qalmaydighanliqini" eskertip, xunende téximu köp kishining mezkur wirustin yuqumlinish éhtimali barliqini chetke qaqmidi.

Shinxu'a axbarat agéntliqining eskertishiche, ürümchide 8 öy qushi 12 - noyabir küni yéngi bayqalghan qush zukam wirusida ölgen. Jonggo memliketlik qush zukam wirusi tejiribixanisi, ölgen qushlarning H5N1 tipliq zukam wirusida ölgenlikini éniqlighan. Xitay hökümiti yéqinda memliket boyiche 14 milyard öy qushigha waksina uridighanliqini jakarlighan. (Erkin)