Qush zukimi sewebidin Uyghur élide 400 mingdin oshuq öy qushi öltürüldi

Qush zukimi késili Uyghur élining poskam, ürümchi we xotenlerde bayqalghandin kéyin, hazirghiche bu rayonlarning etrapidiki 3 kilométir yiraqliqqiche bolghan jaylardin 400 mingdin oshuq toxu, ördek qatarliq öy qushliri öltürüldi. Lékin hökümet da'iriliri bu késelning hazirghiche ademlerde bayqalmighanliqini bildürmekte.

Xitay yéza-igilik ministirlikining bildürüshiche, ürümchide bayqalghan qush zukimi asasliqi ürümchi shehirining dawan yézisi ulanbay kentide we ürümchi nahiyisining enningchü dégen jaylirida körülgen hemde enningchüdila öltürülgen öy qushlirining sani 350 minggha yetken. Melum bolushiche, enningchüde 100 din oshuq toxu férmisi bar bolup, bu toxular asasliqi, ürümchi we qaramay sheherliride sétilidiken.

Hazirghiche qush zukimi Uyghur élidin bashqa yene, xitayning lyawning, xunen, xubéy, ichki mongghul, shenshi we enxuy ölkiliridimu bayqaldi.

Xitay dunyadiki eng chong öy qushlirini béqish sana'itige ige dölet bolup, bu yerde nechche milyard öy qushliri kölimi kichik jaylarda qista-qistangchiliq ichide béqilidu. Uning üstige xitaydiki férmilar ahalilerning olturaq jaylirigha nahayiti yéqin bolghachqa, hazir sehiye teshkilatliri bu késelning insanlar arisida jiq tarqilip kétishidin endishe qilmaqta. (Peride)