Qush zukam wirusi Uyghur aptonom rayonida dawanchinggha kéngeydi

Uyghur aptonom rayonida yéqindin béri arqa arqidin H5N1 tipliq qush zukam wirusi bayqalghandin kéyin, bu qétim mezkur wirus Uyghur aptonom rayonining dawanching shehirige kéngeydi.

Xitay yéza igilik ministirliqining seyshenbe küni étirap qilishiche, Uyghur aptonom rayonining merkizi ürümchining 40 kilométirlarche sherqidiki dawanchingda qush zukam wirusi bayqalghan.

Xitay yéza igilik ministirliqining bayanatida eskertishiche, dawanchingda ötken charshenbe küni 38 öy qushi qush zukam wirusi sewebidin ölgen. Xitayning memliket qush zukam wirusi tejribixanisi öy qushlirining H5N1 tipliq qush zukam wirusida ölgenlikini ispatlighan.

Yéza igilik ministirliqi, mezkur zukam wirusining dawanching bilen birge ningshya tunggan aptonom rayonining merkizi yingchü'en we yünnenning chüyshyong sheherliride bayqalghanliqini élan qildi. Yerlik da'iriler zukam wirusi bayqalghan jaydin 3 kilométirghiche bolghan da'iride yashaydighan öy qushlirini pütünley öltürüp tashlighan.

Dawanchingda 8388 öy qushi öltürülgen. Bu Uyghur aptonom rayonida qush zukam wirusining yéqinqi 3 heptidin béri 5 - qétim bayqilishi bolup hisablinidu. Buningdin ilgiri mezkur wirus ürümchi, ürümchi nahiyisi, poskam we xotenlerde bayqalghan idi. Qush zukam wirusi dawanchingda ötken charshenbe küni bayqalghan bolsimu, emma Uyghur aptonom rayonida chiqidighan xitay metbu'atliri seyshenbe kün'giche bu heqte xewer bermidi. (Erkin)