Qush zukam wirusi bu qétim pichanda bayqaldi

Uyghur aptonom rayonida H5N1 tipliq ejellik qush zukam wirusi dawamliq kéngeymekte. Xitay yéza igilik ministirliqining seyshenbe küni ashkarilishiche, yéqinda turpanning yar yézisida qush zukam wirusi bayqalghandin kéyin, bu qétim turpan wilayitining pichan nahiyiside 300 öy qushi mezkur zukam wirusida ölgen.

Xitay memliketlik qush zukam wirusi tejribixanisi pichanda ölgen öy qushlirining H5N1 tipliq zukam wirusida ölgenlikini ispatlidi. 11 - Ay kirgendin béri xoten, ürümchi, dawanching, turpan, poskam qatarliq jaylarda arqa - arqidin ejellik qush zukam wirusi bayqilip, Uyghur aptonom rayoni xitay boyiche qush zukam wirusi eng köp tarqalghan rayon bolup qaldi.

Qush zukam wirusi 22 - noyabirda bayqalghan bolsimu, emma xitay yéza igilik ministirliqi bu xewerni néme üchün emdi élan qilghanliqini chüshendürmigen. Aptonom rayonluq charwichiliq nazariti da'irilirining tekitlishiche, zukam wirusining tarqilish weqesi aptonom rayonning " ichki mexpiyetliki" hisablinidiken.

Da'iriler, pichanda qush zukam wirusi bayqalghan jayning 3 kilométir etrapida yashaydighan barliq öy qushlirini öltürgen. Xitay yéza igilik ministirliqi, pichan bilen birge xunenning yongju shehiridimu H5N1 tipliq zukam wirusi bayqalghanliqini élan qildi. Yongjuda, 400 dek öy qushi mezkur zukam wirusi sewebidin ölgen. (Erkin)