Qush zukimi emdi köneste bayqaldi

Xitay da'iriliri charshenbe küni qush zukimi heqqide doklat bérip, Uyghur élining könes nahiyisining beshtöpe yézisida yéngidin qush zukam wirusi bayqalghanliqini élan qildi. Shuning bilen xitayda bu yil jem'iy 30 qétim qush zukimi wirusining tarqilish ehwali körüldi.

Xitay yéza‏-igilik ministirliqining melum qilishiche, könestiki qush zukam késili 24‏- noyabir küni deslep bayqalghan bolup, u chaghda 300 yéqin öy qushliri tuyuqsiz ölüp ketken. Kéyin munasiwetlik orunlarning tekshürüshi netijiside, bu qushlarning qush zukimi késili bilen ölgenliki éniqlan'ghan.

Bu yerdiki haywanlarni dawalash ponkitliri, bu késel taralghan rayondin 3 kilométir yiraqliqtiki jaylardiki barliq öy qushlirini öltürgen. Uyghur aptonom rayonluq haywanlarni dawalash organliri hazirghiche, qush zukimi sewebidin 1milyon 180 ming dane öy qushini öltürüp bolghan.

Emma könestiki bu yéngi qush zukam késili ehwali xitay yéza igilik ministirliqi élan qilghan'gha qeder, Uyghur élining héchqaysi xewer wastilirida bérilmigen.

Hazirghiche xitay hökümiti her qétim bu késel bayqilip az dégende 3-4 kündin kéyin, bolupmu bu wirus taralghan rayonlar karantin astigha élinip yuqumlan'ghan öy qushliri öltürülüp bolghandin kéyin, andin bu heqte melumat bérilip keldi. (Peride)