Rabiye qadir norwigiye kishilik hoquq mukapatigha érishti

Norwigiye kishilik hoquq mukapati "rafto mukapati" gha érishken kishilik hoquq pa'aliyetchisi rabiye qadirning mukapatini , uninggha wakaliten yoldishi sidiq haji rozi bilen qizi eqide sidiq tapshuriwalidu .

Mukapat tarqitish murasimi 11 - ayning 7 - küni norwégiyening bérgén döletlik tiyatirxanisida ötküzilidiken . Rafto fondi jem'iyiti , mukapat rabiye qadirning insanperwerlik , balilar we ayallar hoquqini öz ichige alghan kishilik hoquqning asasi prinsiplirini qoghdash yolida körsetken tirishchanliqigha bérilgenlikini élan qildi .Rafto fondi jem'iyiti rabiye qadirgha mukapat bérilgenliki munasiwiti bilen élan qilghan bayanatida , Uyghur élidiki kishilik hoquq depsendichilikining qobul qilinmaydighanliqi , Uyghurlargha medeniyet hoquqi we diniy erkinlik hoquqi bérilishi kérek dep qaraydighanliqini tekitligen .

Rabiye qadir ilgiri Uyghur ayallarni teshkillep "ming ana shirkiti" ni qurghan . Bu yilliq rafto mukapatining rabiye qadirgha bérilgenliki xelq'ara metbu'atlarda keng yer bérildi . Roytérs axbarat agéntliqi norwégiye kishilik hoquq mukapatining xitaydiki yuqiri inawetke ige siyasi mehbusqa bérilgenliki muhim bir isharet dep körsetti . Yene bezi metbu'atlar , rafto mukapatining nobél mukapati yolidiki axirqi basquch hisaplinidighanliqini eskertti . Rabiye qadirning jaza mudditi 2006 - yili 8 - ayda toshidu. Rabiye qadirning amérikidiki qizi eqide sidiq , anisining salametlikidin endishe qiliwatqanliqini bildürdi .(Erkin)