Rabiye qadir xanim, dunya jama'etchilikini xitaydiki kishilik hoquqni ilgiri sürüshke chaqirdi

U shenbe küni roytirs agéntliqi muxbirining ziyaritini qubul qilghanda, "xitay bilen soda qiliwatqan tijaretchiler choqum yürükige qol sélip béqip, özlirige némining eng muhimliqini- pulningmu, tijaretningmu yaki birsining hayatiningmu? shuni obdan dengsep béqishi kérek" dégen. U yene, "men birsining hayatini saqlap qélish üchün, barliq tijaritimdin waz kéchishni xalaymen", dep körsetken.

Rabiye qadir xanim ötken peyshenbe küni qoyup bérilip, amérika diplomatiye xadimlirining hemraliqida washin'gton'gha yitip kelgen idi. Rabiye qadir xanimning roytirs agéntliqigha bildürüshiche, xitay da'iriliri uni qoyup bergende, yene alte balisining xitayda ikenlikini eskertip, uni metbu'atlarda söz qilmasliqqa agahlandurghan.

Emma, rabiye qadir xanim türme weziyitining intayin nacharliqini teswirlep, bolupmu siyasiy jinayetchilerge héchqandaq shepqet qilinmaydighanliqini bildürgen. U yene türme xadimlirini gerche özige tegmigen bolsimu, biraq yandiki türmidashlirini qiynap, uni qorqutushqa urun'ghanliqini éytqan.

Rabiye qadir xanim ziyaretning axirida, "men xelqimge yenila asasiy kishilik hoquq we erkinlikni telep qilimen. Men xelqimning xitaylargha oxshashla bextlik turmushqa érishishini ümid qilimen" dégen. (Arzu)