Rabiye qadirning qoyup bérilgenliki zulumgha qarshi bir ghelibe hésaplinidu

Bügün , amérikida chiqidighan dangliq "wal strit zhornal" gézitide élan qilin'ghan bir maqalida, néme sewebtin bolushidin qet'iynezer, ataqliq Uyghur kishilik hoquq pa'aliyetchisi rabiye qadirning qoyup bérilgenliki, erkinlikning zulumgha qarshi bir ghelibisi hésaplinidu. Uning qoyup bérilgenliki shundaqla, hetta diktator tüzümlerningmu xelq'ara bisimgha boyun igishke mejbur bolidighanliqini ispatlidi déyilgen.

Uyghur amérika birleshmisining bash katipi alim seytof teripidin élan qilin'ghan bu maqalida yene mundaq déyilgen, " xitay hökümiti rabiye qadirni türmige tashlash arqiliq Uyghur xelqighe, ular qanchilik bay, qanchilik siyasiy tesirge ége, qanchilik eqilliq bolushidin qet'iynezer, xitay hökümitining menpe'eti üchün xizmet qilmisa, yoq qilip tashlaydighanliqini körsitishni oylighan . Deslepte, xitay rehberliri rabiye qadirnimu bashqa Uyghur siyasiy mehbuslirigha oxshash türmige qamapla, unutturiwiteleymiz dep oylidi . Xitay hökümiti xelq'ara jama'etchilikning rabiye qadir mesilisige bundaq jiddi qarap, uning qoyup bérilishi üchün , béyjing hökümitige bundaq qattiq bésim qilidighanliqini oylapmu baqmidi .

Alim seytof , "wal strit zhornal" gézitide élan qilin'ghan maqalisini töwendiki sözler bilen ayaqlashturghan:

"Rabiye qadirning qoyup bérilgenlikini hergizmu xitayning Uyghur xelqighe qaratqan siyastini özgertkenliki we xitayda kishilik hoquq weziyitining yaxshilan'ghanliqining bir ishariti dep qarimasliq kérek. Emma rabiye qadirning qoyup bérilgenliki, Uyghur xelqining xitay hökümitining -1949 yilidin béri sherqi türkistanda élip bériwatqan qattiq qol siyasitige qarshi tunji meniwi ghelibisi ikenliki éniq. (Qanat)