Rabiye qadir qolgha élinish sewepliri heqqide toxtaldi

Ötken hepte xitay hökümiti teripidin "dawalash üchün kapaletke bérish" nami bilen qoyup bérilgen kéyin, amérikigha sürgün qilin'ghan ataghliq kishilik hoquq pa'aliyetchisi rabiye qadir, 1999 - yili 8 - ayda xitay saqchiliri teripidin qolgha élin'ghan chaghdiki ehwallarni ashkarilidi.

Rabiye qadir amérika dölet mejlisining ürümchini ziyaret qilish ömiki bilen körüshkili kétiwatqanda qolgha élin'ghan. Rabiye qadirning bildürüshiche, u qolgha élin'ghanda " kümüsh astane" mihmanxanisigha chüshken amérika dölet mejlisi wekiller ömiki bilen körüshkili kétiwatqan bolup, u amérikiliqlargha xitay türmisidiki ölüm jazasigha höküm qilin'ghan Uyghur mehbuslarning tizimlikini shundaqla özining amérika hökümitige yazghan Uyghurlarning kishilik hoquqining qandaq depsende qiliniwatqanliqi toghrisidiki erznamisini tapshurmaqchiken.

Biraq, uning yanchuqidiki tizimlik we erzname xitay saqchiliri teripidin tartiwélin'ghan. Rabiye qadir, "kümüsh astane" mihmanxanisigha yétip baray dégende, uning arqisigha chüshken xitay dölet bixeterlik nazaritining mexpiy saqchiliri teripidin tosiwélin'ghan idi. Mexpiy saqchilar uni shu yerde qolgha alghan. Rabiye xanim qolgha élin'ghan chaghdiki bu ehwallarni xelq'ara kechürüm teshkilatining aldinqi küni uning sheripige uyushturghan kechlik kütüwélish murasimida muxbirimizgha ashkarilidi. (Erkin)