Rabiye qadir xanim Uyghurlarning kishilik hoquq üchün dawamliq küresh qilidighanliqini bildürdi

Ataqliq Uyghur kishilik hoquq pa'aliyetchisi rabiye qadir xanim, en'giliye b b s radi'o - téléwiziye shirkitining ziyaritini qobul qilip, özining kishilik hoquqni qoghdash üchün dawamliq pa'aliyet élip bardighanliqini tekitlidi.

Rabiye qadir xanim, 21 - iyun küni en'giliyge yétip bérip, en'giliye parlaménti, xelq'ara kechürüm teshkilati we en'giliyidiki kishilik hoquq teshkilatliri bilen uchriship, xitay hökümitining Uyghurlargha qaratqan siyasitidin qattiq narazi ikenlikini bildürdi.

Rabiye qadir xanim, 2000 - yili 3 - ayda xitay hökümiti teripidin, chégra sirtidiki teshkilatlarni dölet mexpiyetliki bilen teminligen dégen jinayet bilen eyilinip, 8 yilliq qamaq jazasi bilen jazalan'ghan idi.

Rabiye xanim , bu yil 3 - ayda muddettin burun qoyup bérilip, amérikigha sürgün qilindi. Gerche xitay da'iriliri uni qoyup bérish aldida, uning amérikida héchqandaq pa'aliyet élip barmasliqini, eger undaq bolmaydiken balilirining tehdit astida qalidighanliqini bildürüp, uninggha bésim ishletken bolsimu, rabiye qadir xanim öz xelqining kishilik hoquqini qolgha keltürüsh üchün élip baridighan pa'aliyitige héchqandaq küchning tosqunluq qilalmaydighanliqini, Uyghurlarning heq - hoquqini eslige keltürüsh üchün yalghuz amérkidila emes belki pütün dunyada pa'aliyet élip baridighanliqini jakarlidi.(Eqide)