Amérika dölet mejlisi kishilik hoquq komitéti we rabiye xanim

Amérikida chiqidighan "xiristi'an ilim-pen közitish" xewer torida düshenbe küni ataghliq Uyghur pa'aliyetchisi rabiye qadir xanim we amérika dölet mejlisi kishilik hoquq komitéti toghrisida maqale élan qilinip, bu teshkilatning rabiye xanimning qoyup bérilishide oynighan roli sherhilendi.

Maqalida, rabiye xanimning qoyup bérilish jeryani we uning türmidiki axirqi mezgilide xitay hökümitining uninggha tutqan pozitsiyisini tuyuqsiz özgertkenlikige a'it melumatlar teswirlen'gen.

Maqalida körsitilishiche yene, rabiye xanimning qizi eqide aptorning ziyaritini qobul qilghanda, uninggha amérika dölet mejlisi kishilik hoquq komitétining, apisi rabiye xanimning qoyup bérilishide intayin muhim rol oynighanliqini, shundaqla bu komitétning rabiye xanimning mesilisini otturigha élip chiqish herikitini qet'iy toxtitip qoymighanliqini bildürgen.

Mezkur maqalidin melum bolushiche yene, hazir amérika dölet mejlisidiki gheyri-resmiy teshkilatlarning kishilik hoquq yolidiki pa'aliyetliri barghanséri janliniwatqan bolup, bularning arisida amérika awam palata ezasi tom lentos bashchilighidiki kishilik hoquq komitétining netijisi körünerlik bolghan.

Dölet mejlisi kishilik hoquq komitéti, tom lentos bilen yene bir awam palata ezasi jon portér teripidin 1983 - yili qurulghan bolup, bu komitétning hazir 188 ezasi bar. (Peride)