Xitay hökümiti amérikini rabiye qadirgha sehne hazirlap bermeslikke chaqirdi

Ataghliq Uyghur pa'aliyetchisi rabiye qadir charshenbe küni amérika dölet mejliside ispatliq bérip, xitay hökümitining Uyghurlargha séliwatqan ziyankeshliklirini bayan qilghandin kéyin, xitay tashqi ishlar ministirliqi peyshenbe küni amérikini rabiye qadirgha sehne hazirlap bermeslikke chaqirdi.

Xitay tashqi ishlar ministirliqining bayanatchisi chin gang muxbirlarni kütiwélish yighinida, "amérika hökümiti rabiye qadirning xitaydin bölünüshni meqset qilghan pa'aliyetlirige we bu heqtiki bayanlirigha sehne hazirlap bermesliki kérek" dégen.

Rabiye qadir charshenbe küni amérika dölet mejliside , béyjing hökümitining amérika yétekchilikidiki "térrorchiliqqa qarshi urush" tin paydilinip Uyghurlarni basturiwatqanliqini körsitip, "bügünki künde, bizning medeniyitimiz, tariximiz we tilimizdin bashqa, bizning bu yerde ezeldin bar bolghan mewjutluqimizmu béyjing hökümitining wehshi siyasitining tehditi astida qéliwatidu" dédi.

Yighinda söz qilghan xelq'ara kechürüm teshkilati amérika shöbisining asiya ishliri mes'uli t. Kumar Uyghur élining xitaydiki siyasiy jinayetchilerge ölüm jazasi bérilidighan birdin-bir jay ikenlikini éytti. U yene, "amérika prézidénti jorj w bush, xitay dölet re'isi xu jintaw kéler yilning béshida amérikigha ziyaretke kélishtin burun, rabiye qadirni aq saraygha teklip qilishi kérek" dédi. (Peride)