Рабийә қадир америка ташқий ишлар министирлиқидики әмәлдарларға уйғурлар диний кризисқа учримақта деди

• 
  2006-08-04

Уйғур кишилик һоқуқи рәһбири рабийә қадир йеқинда америка ташқий ишлар министирлиқидики әмәлдарлар билән учришип, уйғурларниң диний әркинлик мәсилилирини асасий тема қилған бир қатар мәсилиләр үстидә пикир алмаштурди.

Америка ташқий ишлар министирлиқидики диний әркинлик ишлириға мәсул баш әлчи җон ханфрид қатарлиқ әмәлдарлар билән учрашқан рабийә қадир, хитай һөкүмити қанунсиз диний унсурлар вә паалийәтләрни бастуруш нами астида уйғурларниң диний әркинликигә зәрбә берип, охшимиған қараштики диний затларни террорчи, бөлгүнчи дигән намлар билән җазалаватиду, дәп көрсәтти.

Униң әскәртишичә, хитай һөкүмитиниң уйғур диний затларни бастуруш һәрикити 11 - синтәбир вәқәсидин кейин техиму җиддий түс алған. У," хитай һөкүмитиниң диний сиясити уйғурларни җиддий диний кризисқа дуч кәлтүрүп қойди" дәйду.

Рабийә қадирниң америка әмәлдарлириға тәкитлишичә, хитай һөкүмитиниң уйғурларни диний турмуш вә ислами пәрһизләрни ада қилиштин мәһрум қалдуруши, уйғур җәмийитидә әхлақий чөкүшни тезләтмәктә. Америка ташқий ишлар министирлиқи һәр йили бир қетим елан қилидиған диний әркинлик вә кишилик һоқуқ тоғрисидики йиллиқ доклатида, хитай һөкүмити уйғурлар, тибәтләр вә христанлар вә фалунгуң муритлириниң диний әркинликини боғмақта, дәп тәнқид қилип кәлди. (Әркин)