Rabiye qadir amérika tashqiy ishlar ministirliqidiki emeldarlargha Uyghurlar diniy krizisqa uchrimaqta dédi

Uyghur kishilik hoquqi rehbiri rabiye qadir yéqinda amérika tashqiy ishlar ministirliqidiki emeldarlar bilen uchriship, Uyghurlarning diniy erkinlik mesililirini asasiy téma qilghan bir qatar mesililer üstide pikir almashturdi.

Amérika tashqiy ishlar ministirliqidiki diniy erkinlik ishlirigha mes'ul bash elchi jon xanfrid qatarliq emeldarlar bilen uchrashqan rabiye qadir, xitay hökümiti qanunsiz diniy unsurlar we pa'aliyetlerni basturush nami astida Uyghurlarning diniy erkinlikige zerbe bérip, oxshimighan qarashtiki diniy zatlarni térrorchi, bölgünchi digen namlar bilen jazalawatidu, dep körsetti.

Uning eskertishiche, xitay hökümitining Uyghur diniy zatlarni basturush herikiti 11 - sintebir weqesidin kéyin téximu jiddiy tüs alghan. U," xitay hökümitining diniy siyasiti Uyghurlarni jiddiy diniy krizisqa duch keltürüp qoydi" deydu.

Rabiye qadirning amérika emeldarlirigha tekitlishiche, xitay hökümitining Uyghurlarni diniy turmush we islami perhizlerni ada qilishtin mehrum qaldurushi, Uyghur jem'iyitide exlaqiy chöküshni tézletmekte. Amérika tashqiy ishlar ministirliqi her yili bir qétim élan qilidighan diniy erkinlik we kishilik hoquq toghrisidiki yilliq doklatida, xitay hökümiti Uyghurlar, tibetler we xrist'anlar we falun'gung muritlirining diniy erkinlikini boghmaqta, dep tenqid qilip keldi. (Erkin)