Xitay da'iriliri xitay chégrisi ichide "rabiye qadir" dégen isimni atimasliqni telep qildi

Uyghur milliy herikitining siyasiy rehbiri, dunya Uyghur qurultiyining re'isi rabiye qadir xanimning, bu yilliq "nobil ténchliq mukapati" gha qayta namzat qilip körsitilishi, xitay da'irilirining naraziliqini qozghapla qalmay, ularni metbu'atlarni qattiq kontrol qilish, hetta xitay chégrisi ichide rabiye qadirning ismini atimasliq tedbirlirini qollinishqa mejburlidi.

Teywen merkizi agéntliqining peyshenbe küni bergen xewirige qarighanda, rabiye qadir xanim bu yil "nobil ténchliq mukapati" gha qayta namzat qilip körsitilgendin kéyin, Uyghur aptonom rayonluq teshwiqat bölümi axbarat orunlirining siyasiy mes'uliyitini yaxshi tonup, rabiye qadir heqqide héchqandaq uchur we mulahize élan qilmasliqini shuningdek buning shinjangning muqimsizliqini keltürüp chiqirighan nazuk bir mesile ikenlikini alahide tekitligen.

Özini ashkarilashni xalimighan bir Uyghur , teywen agéntliqigha mundaq dégen": gerche xitay da'iriliri Uyghurlarni rabiye qadir heqqide éghiz achmasliq heqqide qattiq chare - tedbirlerni qollinidighanliqini bildürsimu, emma köpligen Uyghurlar chet'el metbu'atliri arqiliq uning "nobil mukapati"gha namzat qilip körsitilgenlikidin xewer tépip, cheksiz xoshalliqqa chömdi we qattiq hayajanlandi hemde yoshurun halda öz öyliride tebriklesh pa'aliyetliri élip bardi"

Meshhur kishilik hoquq pa'aliyetchisi rabiye qadir xanim erkinlikke chiqqan kündin béri, xitay türmisidiki gunahsiz Uyghurlarni qutuldurush yolini izdesh we Uyghurlargha qaritilghan pilanliq tughut siyasitining heqiqiy mahiyitini ashkarilash heriketliri élip bardi. U, 2006 ‏- yili nobil mukapatigha namzat qilip körsitildi we chet'ellerdiki Uyghurlarning eng aliy orgini hésablan'ghan dunya Uyghur qurultiyigha re'is bolup saylandi. (Eqide)