Америка : җуңго рабийә қадирниң пәрзәнтлирини дәрһал қоюп бериши керәк

Америка ташқий ишлар министирлиқи пәйшәнбә күни чүштин кейин баянат елан қилип, уйғур кишилик һоқуқ вә демократийә һәрикитиниң рәһбири рабийә қадирниң хитай даирилири тәрипидин қолға елинған 3 пәрзәнтини дәрһал қоюп беришни тәләп қилди.

Ташқий ишлар министирлиқиниң күндилик ахбарат елан қилиш йиғинида мухбирларниң бу һәқтики суалиға җаваб бәргән баянатчи, уйғур рәһбириниң 3 пәрзәнти қолға елинғанлиқидин америкиниң "чоңқур әндишә туюватқанлиқини" билдүрди.

Ташқий ишлар министирлиқиниң баянатчиси," рабийә қадирниң пәрзәнтлири қолға елинғанлиқидин вә бир яки униңдин көп пәрзәнтиниң таяқ йигәнлики һәққидики хәвәрләрдин чоңқур әндишә қиливатимиз" дәйду. Баянатчиниң әскәртишичә, америка рабийә қадирниң пәрзәнтлирини дәрһал қоюп беришни тәләп қилған . У, " биз әндишимизни хитайниң юқири дәриҗилик һөкүмәт әмәлдарлириға йәткүздуқ вә вәқә үстидин тәкшүрүш елип беришини шундақла рабийә қадирниң пәрзәнтлирини қандақ нам астида қолға алған болушидин қәтий нәзәр қоюп беришини қаттиқ тәләп қилдуқ " дәп көрсәтти.

Рабийә қадир аилисиниң җүмә күни радиомизға ашкарилишичә, хитай сақчилири рабийә қадирниң нәнсәнгә апиримиз , дәп елип маңған нәврә вә җийәнлирини, қизи рошәнгүлни аилисигә қайтуруп келип нәзәрбәнд астиға алған. Лекин оғуллири алим абдуреһим вә абликим абдуреһимларниң һазирғичә из дерикини алалмиған. Сақчилар алим билән абликимни пәйшәнбә күни уланбайға елип берип урған вә абликимниң еғир дәриҗидә зәхмилинип дохтурханиға елип китилгәнлики илгири сүрүлмәктә. Лекин сақчи тәрәп униң қайси дохтурханида икәнликини елан қилип бақмиди. Хитай мәтбуатлири уларниң қолға елинғанлиқини хәвәр қилған. (Әркин)