Rabiye qadir, xelqining kishilik hoquqi we démokratiyisi üchün küresh qilidighanliqini bildürdi

Kishilik hoquqperwer zat rabiye qadir seyshenbe küni béritaniye axbarat tori b b s ning téléwiziye programmisigha qatniship, türmidiki jeryanimda ten jazasigha uchrighan Uyghur yashlirining waqirighan awazini anglidim shundaqla men xelqimning kishilik hoquqi we azatliqi üchün küresh qilimen, dep körsetti.

Rabiye qadirning ashkarilishiche, u türmide ten jazasigha uchrimighan, amma u Uyghur mehbuslarning tayaq azabigha chidimay waqirighan awazini anglighan." U, bir küni türme soraqxanisining karidorida bir yash mehbus bilen uchriship qalghanliqini eskertip, Uyghur mehbusning " ana, sen bu yerde néme qiliwatisen? " " biz sanga oxshash anilar üchün türmige kiriwatimiz," dep xitap qilghanliqini bildürdi.

Uning eskertishiche, Uyghurlarda 7 yashtin 70 yashqiche kishiler musteqilliqni ümid qilidiken, amma héchkim buni ashkare sözleshke jür'et qilalmaydiken. Dunyada musteqilliqni xalimaydighan millet yaki dölet yoqliqini tekitligen rabiye qadir, " amma hazir men Uyghurlarning kishilik hoquqi we erkinliki üchün tirishiwatimen, eger bu nersiler méning xelqimning arzusidiki nersiler bolsa, ular bu nersige tinch yollar bilen érishidu" dep körsetti.

Rabiye qadir, 1999 - yili 3 - ayda xitay hökümiti teripidin 8 yilliq qamaq jazasigha höküm qilin'ghandin kéyin. 17 - Mart küni tuyuqsiz qoyup bérilgen shundaqla shu amérikigha sürgün qilin'ghan idi. (Erkin)