Rabiye qadir xanim birleshken döletler teshkilati kishilik hoquq kéngishning yilliq yighinigha qatnashti

2007-03-27
Élxet
Pikir
Share
Print

3 ‏- Ayning 26 ‏- küni, dunya Uyghur qurultiyi re'isi, dangliq Uyghur kishilik hoquq pa'aliyetchisi rabiye qadir xanim, shiwétsariyening jenwe shehiride échiliwatqan birleshken döletler teshkilati kishilik hoquq kéngishining yilliq yighigha alahide teklip bilen qatnashti.

Rabiye qadir xanim, kéngesh teripidin orunlashturulghan xitaydiki kishilik hoquq weziyiti muhakime yighinida teklip bilen sözge chiqti we xitayning hazir Uyghur élide yürgüzüwatqan pilanliq tughut siyasiti, atalmish qosh tilliq ma'arip siyasiti, diniy we érqiy kemsitish, siyasiy mehbuslargha yürgüzülüwatqan ölum jazaliri, eydiz késili, emgek küchlirini ichkirige yötkesh bahanisi bilen xitay ölkilirige türkümlep toshuluwatqan Uyghur qizliri we ularning xitay yurtliridiki bichare ehwali, Uyghur élidiki hashar qatarliq bir qatar mesililerni otturigha qoydi we Uyghurlarning kishilik hoquqining xitayda éghir depsende qiliniwatqanliqini dunya jama'etchilikige yetküzdi.

Bu yighin'gha birleshken döletler teshkilati kishilik hoquq kéngishige eza 47 dölet wekilliri we xelq'aradiki barliq kishilik hoquq teshkilatliri qatnashqan bolup, rabiye qadir xanimning bayanliri yighin ehlining küchlük diqqet-étibarini qozghidi. Ular rabiye qadir xanimdin xitaydiki kishilik hoquq depsendichiliki we Uyghurlarning hazirqi ehwali toghrisida muhim so'allarni sorashti.

Yighin'gha yene, bir tibet wekil we bir xitay kishilik hoquq pa'aliyetchisimu qatnashqan. Bu yighin bu 2 ‏- ayning 12 ‏- küni bashlan'ghan bolup, 3 ‏- ayning 30 ‏- küni tügeydu. (Jüme)

Pikirler (0)
Share
Toluq bet