Rabiye qadir gollandiyidiki ziyaritini axirlashturdi

Uyghur kishilik hoquqi we démokratiye herikitining rehbiri rabiye qadir, yawropadiki 3 heptilik ziyaritining birinchi békiti gollandiye ziyaritini jüme küni axirlashturdi. Uning yawropa ziyaritining 2 - békiti daniye. U, daniyidiki ziyaritini shenbe küni bashlaydu.

Rabiye qadir gollandiyidiki ziyariti jeryanida peyshenbe küni " xitaydiki untulghan az sanliqlar" dégen témidiki muhakime yighinigha qatniship, Uyghurlarning weziyiti we öz kechürmishlirini tonushturdi. U, shu küni amstérdamda gollandiye tashqi ishlar ministirliqi we gollandiye parlaméntidiki erbaplar bilen "muhim mesililer" boyiche söhbet élip barghan. Emma u, söhbetning tepsilatini ashkarilashni ret qildi.

Rabiye qadir, gollandiyidiki sepirining axirqi küni gollandiye soda sahesidikiler bilen uchrashti we bu yerdiki Uyghur muhajirlar bilen bir arigha keldi. U, shenbe küni daniye paytexti kopénhagén'gha baridu. Rabiye qadir, kopinhagéndiki ziyariti jeryanida daniye axbarat sahesi we daniye parlaméntining ezaliri bilen uchrishidiken.

Rabiye qadir xanim bu yilqi nobél tinchliq mukapatining xelq'ara atom énirgiye idarisining mudiri el baradaygha bérilgen'genlikini amistérdamda anglidi. Rabiye qadir, nobél mukapatining namzatlar tizimlikidiki eng küchlük namzatlarning biri, dep qaralmaqta idi. Emma uning tekitlishiche, u mukapatqa érishelmigenlikidin meyüslenmeydiken. (Erkin)