Rabiye qadir xanim gérmaniyide Uyghur muhajirlar teripidin kütüwélindi

Rabiye qadir gérmaniyide Uyghur muhajirlar teripidin kütüwélindi. DUQ < < Chongaytip Körüng

Ataghliq kishilik hoquq pa'aliyetchisi rabiye qadir jüme küni etigende gérmaniyining myunxén shehridiki xelq'ara aydurumgha yétip kélip, mezkur dölettiki bir heptilik ziyaritini bashlidi.

Rabiye qadir, ayrodromda élan qilghan bayanatida, dunya Uyghur qurultiyini maxtidi shundaqla Uyghurlarni ittipaqliqqa we birlikke chaqirdi. Rabiye qadir gérmaniyidiki yüzlerche Uyghur muhajirlar teripidin ayrodrumda dagh - dugha bilen kütüwélin'ghan.

Dunya Uyghur qurultiyining re'isi erkin aliptékin shundaqla memtimin hezretler, xelq'ara kechürüm teshkilati we merkizi gérmaniyidiki xeter astidiki milletler teshkilatining wekilliri ayrodromda hazir boldi. Bu memtimin hezretning 11 - séntebir weqesidin kéyin tunji qétim ammiwi sorun'gha chiqishi bolup hésablinidu.

Rabiye qadir xanim jüme küni kechte dunya Uyghur qurultiyinining 2- nöwetlik kéngeytilgen yighinining échilish murasimi qatnashqan we yighin ehlige söz qilghan. Yighindin kéyin, rabiye qadir xanimning sheripige ziyapet bérilgen.

Rabiye qadir xanim aldimizdiki hepte ichide gérmaniye parlaménti we hökümitidiki munasiwetlik da'iriler, gérmaniyidiki xelq'ara ammiwi teshkilatlar bilen uchrushidiken.

Igilishimizche xitay hökümiti rabiye qadirning gérmaniyidiki ziyariti munasiwiti bilen bérlin da'irilirigha naraziliq bildürgen. Rabiye qadir myunxén'gha yétip barghandin kéyin, gérmaniye amanliq da'iriliri saqchilarni ewetip bixeterlik tedbirlirini yolgha qoyghan. (Erkin)