D u q re'isi rabiye qadir xanim gérmaniyidiki ziyaritini dawamlashturmaqta

Dunya Uyghur qurultiyining bildürüshiche, Uyghur milliy herikitining rehbiri, dunya Uyghur qurultiyining re'isi rabiye qadir xanim gérmaniyidiki pa'aliyetlirini dawamlashturmaqta. Rabiye qadir xanim, 19-öktebir küni myunxéndiki d u q bash shitabida d u q ning ijra'iye komitétining xizmetlirini anglap, yéngi orunlashturush élip barghandin kéyin, munasiwetlik da'iriler bilen körüshken hemde 21- öktebir küni hamburg shehiridiki gérmaniye xelq sen'iti muzéyida ötküzülgen Uyghur medeniyet küni pa'aliyitige qatnashqan.

Rabiye qadir xanim girmaniyidiki qollighuchi'ilargha imza qoyup bermekte. UAA Photo

Gérmaniyidiki hoquq teshkilatliri, hökümet xadimliri, Uyghurlar mesilisige qiziqquchilardin bolup, 400 din artuq adem qatnashqan bu pa'aliyet üch bölekke bölüp élip bérilghan bolup, birinchi bölikide Uyghurlarning tarixi , medeniyiti, kishilik hoquq ehwali we bashqa munasiwetlik mesililiri tonushturulghan bolsa, ikkinchi bölikide Uyghur milliy naxsha-muzikiliri we usulliri körsitilip, Uyghurlarning meniwi medeniyiti namayen qilin'ghan. Üchinchi bölüki süpitide xelq sen'iti muziyining chong zalida gérmaniyige tonulghan riyasetchining biwasite riyasetchilik qilishi astida, yéqinda gérman tilida neshir qilin'ghan, rabiye qadir xanimning terjimhaligha a'it kitabning bezi jayliri oqup tonushturulghan.

Shundaqla, pa'aliyette rabiye qadir xanim özining terjimhaligha hemde Uyghurlarning nöwette duch kéliwatqan weziyiti heqqide soralghan so'allargha jawab bérip, pa'aliyet qatnashquchilirini Uyghurlarning omumiy ehwali hem türlük mesililiri heqqide etrapliq uchurlar bilen teminligen.

Mezkur medeniyet pa'aliyiti emeliyette rabiye qadir xanimning ish izlirini hemde Uyghurlarni tonushturushni asasiy muddi'a qilghan bolup, gérmaniyining nechchiligen téléwiziye, gézit-zhurnalliri rabiye qadir xanim bilen ayrim söhbetler ötküzgen . Netijide , rabiye qadir we Uyghurlar yene bir qétim gérmaniye metbu'atlirining muhim témisigha aylandi. (Ümidwar)