Rabiye qadir xanim washin'gtonda guwahliq bérish yighinigha qatnishidu

• 
  2006-04-17

Uyghurlarning meniwy anisi we Uyghur kishilik hoquq we démokratiye herikitining rehbiri rabiye qadir xanim,4‏- ayning 18‏- we 19‏- künliri amérika dölet mejliside xitayning kishilik hoquq weziyiti heqqide ötküzülidighan gwwahliqtin ötüsh yéghinigha qatnishidu.

4‏- Ayning 18‏- künidiki yéghin amérika dölet mejlisi kishilik hoquq guruppisining re'isi tam lentos we frank wolf teripidin uyushturulghan . 4‏-Ayning 19 ‏- künidiki yéghin bolsa, amérika dölet mejlisi xelq'ara munasiwetler komitéti afriqa, kishilik hoquq we xelq'ara heriket shübe komitéti teripidin uyushturulghan bolup, rabiye xanim bu yéghin'gha amérika dölet mejlisi xelq'ara munasiwetler komitétining re'isi hanri hayd teripidin alahide teklip qilin'ghan.

Xitayda kishilik hoquqning, yaxshilan'ghan we nacharlashqan terepliri, dégen témida ötküzülidighan bu qétimqi guwahliqtin ötüsh yéghinining meqsiti, xitaydiki kishilik hoquq weziyitini közdin köchürüshtin ibaret iken. Xewerlerge qarighanda, yéghinda bolupmu, pilanliq tughut mesilisi, ishqa orunlishish , hoquq, diniy erkinlik mesilisi, mehbuslarning organlirini ishlitish mesilisi, xitay hökümitining intérnétke bolghan kontrolliqini kücheytkenliki mesilisi qatarliqlar muhakime qilinidiken.

Uyghur kishilik hoquq we démokratiye herikitining rehbiri rabiye xanim, yéghin'gha qatnishish üchün gérmaniyidin bügün amérikigha keldi. Xitay dölet re'isi xu jintawning amérika prézidénti bush bilen uchrishishi harpisida , amérika dölet mejlisining bundaq bir yéghin uyushturghanliqidin nahayiti xorsen ikenlikini ipadiligen rabiyexanim, guwahliqtin ötüsh yéghinida bolupmu, xitay hökümitining Uyghurlargha qaratqan pilanliq tughut siyasiti hemde Uyghur siyasiy mehbuslargha qaratqan ölüm jazasi we ten jazasi mesilisini otturigha qoyidighanliqini bildürdi. (Qanat)