Уйғур миллий һәрикитиниң рәһбири рабийә қадир индиянна штатида


2006.09.25

Уйғур миллий һәрикитиниң рәһбири вә америка уйғур бирләшмисиниң рәиси рабийә қадир ханим америкиниң индиянна университетиниң тәклипигә асасән индиянна штатида, түрлүк тәшкилатлар тәрипидин орунлаштурулған йиғинларға қатнишип, хитай һөкүмитиниң уйғурларға қаратқан сиясити вә уйғурларниң нөвәттики әһвали һәққидә мәлумат бәрмәктә.

Өз мухбиримизниң игилишичә, 9 ‏ - айниң 24‏ - күни рабийә ханим индиянна штатиниң булумиңтон шәһиридики чоң черкавда америкилиқларға сөз қилип, уйғурларниң нөвәттики вәзийити болупму коммунист хитай һөкүмитиниң 1949‏- йилидин йәни шәрқий түркистанни бесивалғандин бери уйғурларға қаратқан сиясити һәққидә мәлумат бәргән.

Рабийә ханим шундақла бу йеғинға қатнашқан америкилиқлардин өз һөкүмитигә һәмдә америка дөләт мәҗлисидики вәкиллиригә хәт йезип, уларни уйғурларниң кишилик һоқуқини дәпсәндә қилишни тохтитиши үчүн хитай һөкүмитигә бесим ишлитишкә чақиришини тәләп қилған.

Рабийә қадир ханим бүгүн индиянна университетида, хәлқара кәчүрүм тәшкилати вә индиянна университети уйғурларниң кишилик һоқуқи мәсилисидә бирликтә тәшкиллигән бир йеғинға қатнишип, университет оқуғучилири вә оқутқучилириға хитай һөкүмитиниң шәрқий түркистанда елип бериватқан сиясити, уйғурларниң кишилик һоқуқ әһвали вә уйғур хәлқиниң мәдәнийити һәққидә мәлумат бериду вә йеғин қатнашқучилириниң бу мәсилә тоғрисидики суаллирини җавабландуриду. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.