Хитай рабийә қадирға нобил тинлиқ мукапати бәрмәслик тоғрисида норвигийини агаһландурған


2006.09.22

Норвигийә мәтбуатлириниң хәвәр қилишичә, хитай ташқий ишлар министирлиқи хитайни зиярәт қиливатқан норвигийә ташқий ишлар вәкилләр өмикигә әгәр нобил мукапати уйғур кишилик һоқуқни қоғдиғучи авангарт зат рабийә қадирға берилсә, бу икки дөләт мунасивитигә еғир тәсир йәткүзиду, дәп агаһландурған.

"Осло кәчлик почта гезити", хитай муавин ташқий ишлар министири җаң сүййүйниң пәйшәнбә күни бейҗиңда норвигийә зиярәт өмикигә, әгәр бу мукапат рабийә қадирға берилсә, икки дөләт мунасивитигә " дәз кетиду" дәп агаһландурғанлиқини хәвәр қилди. Лекин бу агаһландуруш норвигийә даирилириниң наразилиқини қозғиған.

Норвигийә ташқий ишлар министирлиқиниң дөләт секритари реймонд җохансен җүмә күни хитайниң тәһдитини "қобул қилғили болмайдиған" вә " намувапиқ" һәрикәт, дәп әйиблиди. У, нобил мукапат җәмийитиниң һөкүмәткә беқинмайдиған өз алдиға мустәқил орган икәнликини билдүрди.

Норвигийә мәтбуатлири хитайниң һәрикитини натсистлар германийисиниң 1935 - йилдики һәрикити билән селиштурмақта. 1935 - Йили натсистлар германийиси нобил мукапат җәмийитидин бу мукапатни германийилик карл фон осситзийға бәрмәсликни тәләп қилған болсиму, лекин бу мукапатниң осситзийға берилишини тосиялмиған. Буниңға ғәзәпләнгән гетлир германийиликләрниң нобил мукапати елишини чәклигән иди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.