Рабийә қадир ханим 2008- йиллиқ нобел тинчлиқ мукапати намзатлиқиға көрситилди


2008-03-03
Share

Норвегийә нобел җәмийитиниң билдүрүшигә қариғанда, 2008- йиллиқ нобел тинчлиқ мукапати намзатлириниң тизимлики турғузулған болуп, бу йиллиқ 197 нәпәр нобел тинчлиқ мукапати намзатлириниң ичидә уйғур миллий һәрикитиниң йетәкчиси вә кишилик һоқуқ паалийәтчиси рабийә қадир ханимму орун алди.

Нобел мукапати җәмийитиниң ахбаратидин мәлум болушичә, нобел җәмийити йеқинқи йиллардин буян нобел тинчлиқ мукапатиниң даирисини кеңәйткән болуп, буларниң ичигә кишилик һоқуқ, муһит паалийәтчилириму киргүзүлүп кәлмәктә.

Барлиқини уйғурларниң кишилик һоқуқ ишлириға беғишлиған рабийә қадир ханим, 2005- йили ғәриб дөләтлири вә кишилик һоқуқ тәшкилатлириниң бесими билән хитай түрмисидин қоюп берилгәндин буян, һәр йили нобел тинчлиқ мукапатиға намзатлиққа көрситилип келиватқан болуп, у һәр йили әң күчлүк намзатларниң бирси болуп сақланмақта.

Нобел тинчлиқ мукапати саһиблиқиға еришиш буйичә рабийә қадир ханим билән риқабәткә чүшкәнләр ичидә, 2006- йилида бангиладишилиқ банкир муһәммәд юнус вә 2007- йилда йәр шари характерлик иссип кетиш һадисиси үстидә паалийәт елип барған америкиниң сабиқ муавин президенти ал горә әпәнди қатарлиқлар бар.

Рабийә қадир ханим, 2005- йилидин буян нобел тинчлиқ мукапати намзатлиқиға көрситилип келиватқан болуп, бу йил ханимниң 4- қетим мәзкур мукапат намзатлиқиға көрситилиши.

Рабийә қадир ханим 2007- йилида нобел тинчлиқ мукапатиға көрситилгән әң күчлүк ахирқи бир нәччә намзатниң бирси болуп талланған болсиму, әмма ахирида бу шәрәп уйғурларға несип болмай қалған иди.(Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт