Rabiye qadir xanim 2008- yilliq nobél tinchliq mukapati namzatliqigha körsitildi

Norwégiye nobél jem'iyitining bildürüshige qarighanda, 2008- yilliq nobél tinchliq mukapati namzatlirining tizimliki turghuzulghan bolup, bu yilliq 197 neper nobél tinchliq mukapati namzatlirining ichide Uyghur milliy herikitining yétekchisi we kishilik hoquq pa'aliyetchisi rabiye qadir xanimmu orun aldi.

Nobél mukapati jem'iyitining axbaratidin melum bolushiche, nobél jem'iyiti yéqinqi yillardin buyan nobél tinchliq mukapatining da'irisini kéngeytken bolup, bularning ichige kishilik hoquq, muhit pa'aliyetchilirimu kirgüzülüp kelmekte.

Barliqini Uyghurlarning kishilik hoquq ishlirigha béghishlighan rabiye qadir xanim, 2005- yili gherib döletliri we kishilik hoquq teshkilatlirining bésimi bilen xitay türmisidin qoyup bérilgendin buyan, her yili nobél tinchliq mukapatigha namzatliqqa körsitilip kéliwatqan bolup, u her yili eng küchlük namzatlarning birsi bolup saqlanmaqta.

Nobél tinchliq mukapati sahibliqigha érishish buyiche rabiye qadir xanim bilen riqabetke chüshkenler ichide, 2006- yilida ban'giladishiliq bankir muhemmed yunus we 2007- yilda yer shari xaraktérlik issip kétish hadisisi üstide pa'aliyet élip barghan amérikining sabiq mu'awin prézidénti al gore ependi qatarliqlar bar.

Rabiye qadir xanim, 2005- yilidin buyan nobél tinchliq mukapati namzatliqigha körsitilip kéliwatqan bolup, bu yil xanimning 4- qétim mezkur mukapat namzatliqigha körsitilishi.

Rabiye qadir xanim 2007- yilida nobél tinchliq mukapatigha körsitilgen eng küchlük axirqi bir nechche namzatning birsi bolup tallan'ghan bolsimu, emma axirida bu sherep Uyghurlargha nésip bolmay qalghan idi.(Jüme)