Рабийә қадир бейҗиң олимпик тәнтәрбийә мусабиқисини байқут қилишни тәшәббус қилди


2006.11.03
Share on WhatsApp
Share on WhatsApp

Мәшһур кишилик һоқуқ паалийәтчиси вә уйғур миллий һәрикитиниң рәһбири рабийә қадир, тәрәпләрни 2008 - йили бейҗиңда өткүзүлидиған олимпик тәнтәрбийә мусабиқисини байқут қилишқа чақирди. Униң әскәртишичә, хитай уйғурларни үзлүксиз бастуруватқан, кишилик һоқуқи дәпсәндичилики давам қиливатқан әһвалда олимпик йиғинини бейҗиңда өткүзүш тоғра әмәс. У, хәлқарада бейҗиң олимпик йиғинини байқут қилиш һәрикити елип беришни тәшәббус қилди.

Уйғур аптоном райони парткоминиң секритари ваң лечүән 16 - өктәбирдә уйғур өктичилирини бастурушни мәқсәд қилған"алдинала қол селиш, баш көтәргән һаман уҗуқтуруш" сияситиниң районда давамлиқ йолға қоюлидиғанлиқини билдүргән вә узун өтмәй рабийә қадирниң түрмидики 3 оғлини сотлиған иди.

Рабийә қадир ханим, норвигийә " бергин тидәнде" гезитиниң зияритини қобул қилғанда олимпик йиғини һәққидә тохтилип," мән норвигийә олимпик комитетиниң кишилик һоқуқ дәпсәндичиликкә учраватқан әһвалда олимпик мусабиқисини хитайда өткүзүшкә болмайду, дийишини үмид қилимән " деди. У, пәйшәнбә күни норвигийиниң бергин шәһиридә рафто мукапати тәсис қилинғанлиқиниң 20 йиллиқини хатириләш паалийитигә қатнашти.

Рабийә қадир, 2004 - йили баҗяху аяллар түрмисидә йетиватқан мәзгилдә бу мукапат униңға берилгән. У, " хитайни дәвримиздә дунядики әң фашистик дөләт десәк ашурувәткән болмаймиз " дәйду. Рабийә қадир норвигийә кишилик һоқуқ хатирисини махтиди вә " хитайға охшаш бир дөләтниң олимпик мусабиқиси өткүзүшини қандақму қобул қилғили болсун " дәп көрсәтти. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.