Xitay hökümiti "Uyghur medeniyet kéchiliki" küni rabiye qadirning ürümchidiki oghlini soliwaldi

3- Ayning 14 - küni amérika dölet mejliside" Uyghur medeniyet kéchiliki" ötküzülgen küni, Uyghur aptonom rayoni jama'et xewpsizlik nazaritining saqchiliri, Uyghur kishilik hoquqi we démokratiye herikitining rehbiri rabiye qadirning ürümchidiki oghli ablikimni ikki kün saqchi idarisigha soliwalghan.

"Uyghur medeniyet kéchiliki" rabiye qadir we uning xelq'ara Uyghur kishilik hoquqi we démokratiye fondi jem'iyiti teripidin uyushturulghan bolup, medeniyet kéchilikide amérika dölet mejlisining tashqiy ishlar komitéti re'isi we awam palata ezasi tam lantos "biz silerning wetininglardiki weziyetke diqqet qilmaqtimiz. Biz silerning toluq erkinlikinglar we musteqilliqinglarni ilgiri sürimiz" dégen idi.

Saqchilar ablikimni "medeniyet kéchiliki" ötküzülüshning aldi -keynide élip ketken we ikki kün soraq qilghandin kéyin qoyup bergen.

Ürümchidiki weqedin xewerdar kishilerning ashkarilishiche, saqchilar ablikimni jama'et xewpsizlik nazaritige élip barghandin kéyin, rabiye qadirgha axirqi qétim purset béridighanliqini, u "xitay dölet re'isi xu jintaw amérikini ziyaret qilghanda kishilerni namayishqa uyushturmisa we junggogha qarshi herikitini toxtatsa, uning mal mülkini qayturup bérish bilen birge silerning sodanglargha qolayliq yaritip bérimiz," dep tehdit salghan.

Xitay hökümiti ötken yili 3 - ayda rabiye qadirni qoyup bérip uning amérikigha kétishige yol qoyghandin kéyin, shu yili 5 - ayda " eqide soda shirkiti" ning mal mülki we höjjetlirini musadire qilghan.

2005 ‏- Yili 10 - ayda aptonom rayon partkomining sékritari wang léchüen, rabiye qadirni baj oghrilidi we "térrorchilar" bilen til biriktürdi, dep eyibligen idi. Emma rabiye qadirning eskertishiche, u on nechche qétim baj tapshurush ilghari bolup mukapatlan'ghan iken. (Erkin)