Rabiye qadirning a'ilide nezerbend qilin'ghan qizi doxturxanigha élip bérildi

Uyghur rehbiri rabiye qadirning ötken hepte xitay da'iriliri teripidin a'iliside nezerbend astigha élin'ghan qizi roshen'gül abduréhim, salametliki nacharliship ketkenliki sewebidin seyshenbe küni bulaqbéshi yénidiki aptonom rayonluq 2 - doxturxanigha élip bérildi.

Roshen'gül 1 - iyundin béri bulaqbéshi mehellisidiki a'iliside xitay saqchiliri teripidin nezerbend astida tutup turulmaqta idi. U, seyshenbe küni tuyuqsiz bi'aramliq hés qilishqa bashlighan we saqchilarning nazariti astida shu etraptiki 2 - doxturxanigha élip bérilghan. Hazirche uning salametlik ehwali we bi'aramliqigha némining sewebchi bolghanliqi melum emes.

Rabiye qadir a'ilisi saqchilar teripidin tutup kétilgen alim abduréhim we ablikim abduréhim isimlik ikki oghlining hazirghiche iz dérikini alalmighan. Saqchilar ularning qeyerde tutup turuliwatqanliqini élan qilmidi.

Rabiye qadirning ikki oghli bilen qizi roshen'güller amérika dölet mejlisining bir wekiller ömiki ürümchini ziyaret qilghan küni xitay saqchiliri teripidin ulanbaygha élip bérilghan we shu yerde qolgha élin'ghan. Bu jeryanda saqchilar alim bilen ablikimni urghan we roshen'gül a'iliside nezerbend qilin'ghan idi.

Ürümchini ziyaret qilghan amérika dölet mejlisi wekiller ömiki ötken jüme küni amérikigha qaytip keldi. Igilishimizche, rabiye qadir bashchiliqidiki 4 kishilik bir Uyghur wekiller ömiki düshenbe küni dölet mejliside awam palata ezaliri bilen uchriship, Uyghur kishilik hoquqi weziyitining yéqinqi yüzlinishini muzakire qilghan. (Erkin)