Рабийә қадирниң йәнә бир оғлиму қолға елинди

• 
  2006-06-15

Вашингтондики америка уйғур бирләшмисиниң 15 ‏- июн күни билдүрүшичә, хитай һөкүмити рабийә қадир ханимниң қаһар абдуреһим исимлик оғлиниму қолға алған.

Уйғурларниң миллий һәрикитиниң рәһбири рабийә қадир ханим, пәрзәнтлириниң хитай һөкүмити тәрипидин қолға елинғанлиқи һәққидә тохтулуп": хитай һөкүмити мениң гунаһсиз балилиримни дәрһал қоюп бериши керәк, мениң америкида кишилик һоқуқ үчүн елип бериватқан паалийитим сәвәбидин балилиримға ялған төһмәт чаплап, уларни қолға елиши тоғра һесабланмайду" деди.

Хитай сақчи даирилири 6 ‏- айниң 1 ‏- күни, рабийә қадир ханимниң пәрзәнтлири абликим вә алимни қолға елип, қизи рошәнгүлни нәзәрбәнд қилған иди. 13 ‏- Июн күни хитай сақчилири йәнә тутуш буйруқи чиқирип, рабийә ханимниң чоң оғли қаһар абдуреһимниму ақсудики ойидин қолға елип, үрүмчигә елип кәлгән.

Рабийә қадир ханимниң ейтишичә, хитай сақчилири униң пәрзәндлири үстидин охшаш болмиған тутуш буйруқлири чиқирип ,уларни дөләтниң һакимйитини ағдурушқа урунған, баҗ оғрилиған, сорақ җәрянида маслашмиған дегәнгә охшаш җинайәтләр билән әйиблигән.

Уйғурларниң миллий рәһбири рабийә қадир ханим, хитай түрмисидин қоюп берилип әркинликкә чиққандин бери, америка вә яврупа әллиридә, хитай һөкүмиитиниң уйғур хәлқиниң кишилик һоқуқини еғир дәриҗидә дәпсәндә қиливатқанлиқини әйибләп, уйғурларниң сиясий, диний вә маарип һоқуқлирини әслигә кәлтүрүш үчүн актип паалийәтләр елип бериватқан иди.

Америка уйғур бирләшмисиниң билдүрүшичә, хитай даирилири, униң шәрқий түркистанда қалған пәрзәнлиригә давамлиқ түрдә түрлүк тәһдитләрни ишлитип, уларниң башқурушидики рабийә қадир сода сарийи вә әқидә һәссидарлиқ сода ширкитиниң тиҗарәт елип беришиға тосқунлуқ қилип кәлгән. Уйғур көзәткүчиләр "хитай даирилири рабийә қадир ханимниң уйғурларниң демократийә вә кишилик һоқуқи үчүн елип бериватқан һәркәтлирини тохтитиш үчүн, униң пәрзәндлирини җазалап, рабийә қадир ханимға зәрбә бәрмәкчи" дейишмәктә. (Әқидә)