Рабийә қадирниң оғли түрмидә қийнашқа учриди

Уйғурларниң миллий һәрикитиниң рәһбири рабийә қадирниң хитай сақчилири тәрипидин тутуп туриливатқан оғли алим абдуреһим йеқинда түрмидә қийнашқа учриған. Вашингтондики уйғур кишилик һоқуқ тәтқиқат лайиһиси, гәрчә һазир алим абдуреһимниң ярилиниш әһвалиниң қанчилик еғирлиқи мәлум болмисиму, лекин униң сағламлиқидин әндишә қилидиғанлиқини билдүрди.

Алим абдуреһим һазир қалған икки акиси билән бирликтә үрүмчиниң тяншан районлуқ сақчи идарисида тутуп турулмақта. Бу мунасивәт билән баянат елан қилған уйғур кишилик һоқуқ тәтқиқат лайиһисиниң мәлум қилишичә, хитай сақчилири һазир рабийә қадирниң бу пәрзәнтлири билән йеқинқи йилларда алақә қилған һәр қандақ кишиләр үстидин бир-бирләп тәкшүрүш елип барған һәмдә уларни сораққа тартишқа башлиған.

Рабийә ханимниң пәрзәнтлиридин алим абдуреһим, абликим абдуреһим вә рушәнгүл бу йил 5‏-айда америка дөләт мәҗлиси вәкилләр өмикиниң үрүмчигә келиш һарписида хитай сақчилири тәрипидин тутқун қилинған иди. Кейин униң чоң оғли қаһар абдуреһимму тутқунға учрап, рушәнгүл өйдә нәзәрбәнт астиға елинған.

Мәзкур орган баянатида, түрмидә қийин-қистаққа учриған алим абдуреһимниң дәрһал давалинишға еһтияҗлиқ икәнликини вә хитай һөкүмитиниң рабийә ханим пәрзәнтлирини дәрһал қоюп беришини тәләп қилди. Илгири радиомизниң зияритини қобул қилған рабийә ханим хитай һөкүмитиниң бундақ қилиш арқилиқ униң америкидики паалийитини тосашни мәқсәт қилғанлиқини, лекин буниңлиқ билән униң бу йолдики давасиниң һәргизму тохтап қалмайдиғанлиқини ейтти.

Бу вәқәдин әпсусланған дуня уйғур қурултийиму бирләшкән дөләтләр тәшкилати кишилик һоқуқ комитетиға мураҗәтнамә елан қилип, бу органни хитайниң кишилик һоқуқ хатирисини яхши көзитишкә вә өзиниң роли арқилиқ хитайни кишилик һоқуқ вәзийитини яхшилашқа үндәшкә чақирди. (Пәридә)