Rabiye qadirning oghli türmide qiynashqa uchridi


2006.06.25

Uyghurlarning milliy herikitining rehbiri rabiye qadirning xitay saqchiliri teripidin tutup turiliwatqan oghli alim abduréhim yéqinda türmide qiynashqa uchrighan. Washin'gtondiki Uyghur kishilik hoquq tetqiqat layihisi, gerche hazir alim abduréhimning yarilinish ehwalining qanchilik éghirliqi melum bolmisimu, lékin uning saghlamliqidin endishe qilidighanliqini bildürdi.

Alim abduréhim hazir qalghan ikki akisi bilen birlikte ürümchining tyanshan rayonluq saqchi idarisida tutup turulmaqta. Bu munasiwet bilen bayanat élan qilghan Uyghur kishilik hoquq tetqiqat layihisining melum qilishiche, xitay saqchiliri hazir rabiye qadirning bu perzentliri bilen yéqinqi yillarda alaqe qilghan her qandaq kishiler üstidin bir-birlep tekshürüsh élip barghan hemde ularni soraqqa tartishqa bashlighan.

Rabiye xanimning perzentliridin alim abduréhim, ablikim abduréhim we rushen'gül bu yil 5‏-ayda amérika dölet mejlisi wekiller ömikining ürümchige kélish harpisida xitay saqchiliri teripidin tutqun qilin'ghan idi. Kéyin uning chong oghli qahar abduréhimmu tutqun'gha uchrap, rushen'gül öyde nezerbent astigha élin'ghan.

Mezkur organ bayanatida, türmide qiyin-qistaqqa uchrighan alim abduréhimning derhal dawalinishgha éhtiyajliq ikenlikini we xitay hökümitining rabiye xanim perzentlirini derhal qoyup bérishini telep qildi. Ilgiri radi'omizning ziyaritini qobul qilghan rabiye xanim xitay hökümitining bundaq qilish arqiliq uning amérikidiki pa'aliyitini tosashni meqset qilghanliqini, lékin buningliq bilen uning bu yoldiki dawasining hergizmu toxtap qalmaydighanliqini éytti.

Bu weqedin epsuslan'ghan dunya Uyghur qurultiyimu birleshken döletler teshkilati kishilik hoquq komitétigha murajetname élan qilip, bu organni xitayning kishilik hoquq xatirisini yaxshi közitishke we özining roli arqiliq xitayni kishilik hoquq weziyitini yaxshilashqa ündeshke chaqirdi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.