Xitay rabiye qadirning 2 oghlini resmiy eyiblep, yéqinda sot qilmaqchi

Uyghur milliy herikitining rehbiri rabiye qadirning xitay da'iriliri teripidin qolgha élin'ghan ikki oghli xitay teptish da'iriliri teripidin resmiy eyiblinip, sotqa tartilmaqchi. Amérika Uyghur birleshmisi kishilik hoquq programmisi, xitay teptish organlirining qahar abduréhim we alim abduréhimlarni 10‏- iyol küni resmiy sotqa tartishni qarar qilghanliqini bildürdi.

Xitay qanunliri boyiche, teptish da'iriliri jawapkarlar üstidin sot échishni qarar qilip 10 kün'giche sot mehkimisige élip chiqmaydu. Lékin sot échilishqa 3 kün qalghanda jawapkargha uqturidu. 42 Yashliq qahar abduréhim we 31 yashliq alim abduréhim her ikkilisi bajdin qéchish bilen eyiblen'gen we alim yene "döletni parchilashqa urunush" bilenmu eyiblen'gen idi. Téxi buning aldidila 1‏- iyolning aldi-keynide alim abduréhim xitayning qiyin-qistaqqa élishi bilen mejburiy iqrar qildurulghan.

Rabiye xanimning solaqta tutup turiliwatqan yene bir oghli ablikim abduréhim bolsa, hazir xitay saqchiliri teripidin soraqqa tartilmaqta. U "dölet hakimiyitini aghdurushqa qutratquluq qilish" jinayiti bilen eyiblen'gen. Kishilik hoquq programmisining bildürüshiche, xitay teptish emeldarliri alim abduréhim we qahar abduréhining a'ilisidikilerge adwokat tutushqa bolidighanliqini éytqan. Emma adwokatlarning ular bilen körishelishi kapaletke ige bolmighachqa, adwokat tutushning zöröriyitimu chong emesken.

Kishilik hoquq programmisi dériktori alim séytof, bu ehwalning xitay edliyesining rabiye qadir sotlan'ghan waqittin buyan téximu arqigha chékin'genlikini körsitidighanliqini, shundaqla xitayning hazir siyasiy muddi'a bilen ,rabiye we uning perzentliridin öch élishqa tirishiwatqanliqini éytti. (Peride)