Amérika awam palatasi rabiye qadirning perzentlirini qoyup bérish toghrisida xu jingtawgha xet yazdi


2006.08.16

Amérika dölet mejlisining 72 neper awam palata ezasi xitay dölet re'isi xu jingtawgha xet yézip, Uyghur kishilik hoquqi rehbiri rabiye qadirning bu yil 6 - ayda qolgha élin'ghan we resmi sotlaydilanliqini jakalighan 3 oghulini qoyup bérishni telep qildi.

Xette "biz ularning qolgha élinishigha eng küchlük sözler bilen naraziliq bildürümiz we sizning rabiye qadir perzsentlirini derhal we shertsiz qoyup bérishingizni qet'i telep qilimiz," deydu.

Xu jingtawgha yézilghan bu xet awam palatasining xelq'ara munasiwetler komitéti re'isi hénriy xayd we bu komitétning yuquri derijilik ezasi tam lantoslar bashchiliqida qelemge élindi. Xette, rabiye qadirning newriliridin serdar, chiparlar, tuqqanliri qeyser, rahile, turghun we qizi roshen'güller qoyup bérilgen bolsimu, " lékin ularning bixeterliki we salametkilikidin ensirewatimiz," dep yazghan.

Qahar, ablikim we alim abduréhimlarning baj oghurlash, döletni parchilash, hökümetni aghdurmaqchi boldi, dep eyplen'genlikini tekitligen xette, " hökümitingizning bu eyiplishini ishenchlik, dep qarighili bolmaydu. Hich bir seweb rabiye qadirning newre we perzentlirige zorluq küch ishlitishni heqliq chiqarmaydu, "dep tekitligen.

Xitay da'iriliri esli 7 - ayning 19 - küni rabiye qadirning oghullirini sotlimaqchi idi. Lékin ularning soti sot künige bir kün qalghanda melum bolmighan sewebler bilen kéchiktürüldi. Xette " biz rabiye qadir a'ile tawabatigha qilin'ghan mu'amilini jonggo puqralirining asasi qanundiki heq hoquqi we jonggo imza qoyghan xelq'ara ehdiname we kélishimlerge xilap, dep qaraymiz," dep yazghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.