Xitay da'iriliri rabiye qadir xanimning oghli alim abduréhimni 7 yilliq qamaq jazasigha höküm qildi

Ürümchi sheherlik ottura xelq sot mehkimisi kishilik hoquqi pa'aliyetchisi we dunya Uyghur qurultiyi re'isi rabiye qadir xanimning kenji oghli alim abduréhimgha baj oghrilash jinayiti artip, 7 yilliq qamaq jazasigha höküm qildi we 500 ming yüen jerimane qoydi. Chong oghli qahar abduréhimgha 100 ming yüen jerimane qoyghan, lékin uni qamaq jazasigha höküm qilmighan.

Qahar we alim abduréhimlarning soti bu yil 8 - ayda bashlan'ghan bolsimu, lékin sot mehkimisining hökümi dunya Uyghur qurultiyi gérmaniyide yighin chaqirip, rabiye qadir xanimni qurultay re'islikige saylighandin bir kün kéyin élan qilindi.

Shinxu'a axbarat agéntliqi, alim abduréhimning 208 ming yüen baj oghurlighanliqini,qahar abduréhimni 2 yérim milyon yüen baj qachurghanliqini ilgiri sürdi.

Xitay da'iriliri rabiye qadir xanim bu yil 5 - ayda amérika Uyghur jem'iyitining re'islikige saylan'ghandin kéyin uning perzentlirini qolgha alghan. Bu qétim u dunya Uyghur qurultiyining re'islikige saylan'ghandin kéyin ular üstidin sot hökümi élan qildi.

Merkizi nyu - yorktiki kishilik hoquqni közütüsh teshkilatining tetqiqatchisi nikolas békyulin, sot hökümiti "rabiye qadirning Uyghur dawasi qiliwatqanliqidin öch élish ikenliki nahayiti éniq," deydu. U roytérs axbarat agéntliqigha bergen bayanatida, "biz sotning adil bolghanliqidin yéterlik derijide gumanlinimiz shundaqla eyiplen'güchiler qanuni wakaletchilikke érishelmidi, dep qaraymiz," dep körsetti.

Xitay da'iriliri alim abduréhimni baj oghrilidi, dep qarighan yillar rabiye qadir téxi qolgha élinmighan bolup, eqide shirkitining qanuni wekili idi. U, bu yillarda xitay boyiche 18 qétim baj tapshurush bayraqdari bolup mukapatlan'ghan, xitay da'iriliri uni qolgha alghanda "dölet mexpiyetlikini ashkarilidi," dep eyibligen idi. (Erkin)