Kishilik hoquq teshkilatliri xitay hökümitini rabiye qadir xanimning oghli üstidin chiqarghan sot hökümi heqqide qattiq eyiblidi

Dangliq kishilik hoquq pa'aliyetchisi, Uyghur milliy herikitining rehbiri rabiye qadir xanim dunya Uyghur qurultiyining re'isi bolup saylan'ghan künining etisila, uning oghli alim abduréhimgha xitay hökümiti teripidin baj oghrilidi dégen bahane bilen 7 yilliq qamaq jazasi bérilgen. Xitay hökümitining rabiye qadir xanimning oghli üstidin chiqarghan bu sot hökümi xelq'ara kishilik hoquq közitish teshkilati, xelq'ara kechürüm teshkilati we amérika Uyghur birleshmisi qatarliq teshkilatlarning qattiq naraziliqini qozghidi. Mezkur kishilik hoquq teshkilatliri arqa -arqidin bayanat élan qilip, xitay hökümitining bu xil chidimasliq, öch élish qilmishini qattiq eyiblimekte.

Xelq'ara kishilik hoquq közitish teshkilatining mes'uli nikola ependi özining bu heqtiki bayanatida "biz xitay hökümitining bu xil qilmishini rabiye qadir xanimgha qaritilghan öch élish herikiti dep chüshensek bolidu, rabiye qadir xanim Uyghur millitige wakaliten kishilik hoquq mesilisi heqqide küresh élip barmaqta. Xitay hökümiti buningdin qattiq ghezeplenmekte" dep bildürdi.

Londondiki xelq'ara kechürüm teshkilatimu bu heqte bayanat élan qilip, "rabiye qadir xanim türmidin qoyup bérilgende, xitay hökümiti uni siyasiy heriketlerge qatnashmasliq heqqide agahlandurghan. Lékin rabiye qadir xanim kishilik hoquq mesilisi heqqidiki pa'aliyitini izchil dawamlashturghan. Shunga xitay hökümitining bu xil qilmishi pütünley bir xil siyasiy meqsetlik öch élish herikiti bolup hésablinidu. Xitay hökümiti rabiye qadir xanimning a'ilisige qiliwatqan bu xil hujumni derhal toxtitishi kérek" dep bildürdi.

Amérika Uyghur birleshmisining kishilik hoquq ishliri mes'uli xitay hökümitini qattiq eyiblep "rabiye qadir xanimning ballirida hich gunah yoq, bu peqet xitay hökümitining rabiye qadir xanimdin öch élishining ipadisi. Rabiye qadir xanim amérikigha kelgendin buyan Uyghur xelqining kishilik hoquq mesilisige yéqindin köngül bölüp kelmekte. U xelq'ara qanunigha xilapliq qilmidi, eksiche xitay hökümiti kishilik hoquqni depsende qilip, rabiye qadir xanimning a'ilisige xatirjemlik bermeywatidu" dep körsetti. (Méhriban)