Rabiye qadirning perzentliri xitay hökümitining zerbisige uchridi

Xelq'ara Uyghur kishilik hoquq we démokratiye fondi we amérika Uyghur birleshmisining re'isi rabiye qadir xanimning perzentliri ikki kündin béri xitay hökümiti saqchi organliri teripidin nazaret astigha élin'ghandin sirt, rabiye qadirning ablikim isimlik oghli saqchilardin qattiq tayaq yigen, istansimizning igilishiche alim hazir doxturxanida iken.

Chet'ellerde Uyghurlarning démokratiye we kishilik hoquqi üchün pa'aliyet élip bériwatqan Uyghur teshkilatliri hemde pa'aliyetchilirining bildürüshiche, xitay hökümitining rabiye qadirning perzentliri üstidin élip bériwatqan heriketliri, bolupmu ürümchide tijaret qiliwatqan " eqide" shirkitini 8 milyon 70 ming yüen baj oghrilidi dégen yalghan pakitni oydurup chiqirishi, bir tereptin rabiye qadirning chet'eldiki obrazini xunukleshtürüsh, yene bir tereptin uning perzentlirini jazalash arqiliq, rabiye qadirni amérika hemde pütün dunyada Uyghurlar üchün pa'aliyet élip bérishtin toxtitish meqsidige yétishtin ibaret iken.

Xitay hökümitining tengritagh tori, 1 ‏- iyun küni rabiye qadir we uning perzentliri heqqide xewer bérip, xitay hökümitining rabiye qadirni nöwette chet'eldiki "üch xil küch"lerning kattibashliridin biri, dep eyibligenlikini shuningdek saqchilarning yene alim abduréhim, ablikim abduréhimlarni qolgha alghanliqini, roshen'gül abduréhimni qanun boyiche a'ilisde nezerbend astigha alghanliqini bildürgen.

Istansimizning igilishiche, alim abduréhim resmiy qolghan élin'ghan, ablikim saqchilarning tayaq zerbisidin doxturxanida yétip qalghan. Roshen'gül we rabiye qadirning newriliri nezerbendke élin'ghan iken. (Eqide)