Xitay rabiye qadir xanimning ikki oghli üstide élip bérilghan sot hökümini ashkarilimidi

Xitay da'iriliri, 26 ‏- öktebir küni Uyghur siyasiy herikitining yétekchisi, ataqliq kishilik hoquq pa'aliyetchisi rabiye qadir xanimning ikki perzenti üstidin yépiq sot échip, sot hökümini élan qilmidi.

Istansimiz igiligen ishenchilik xewerlerge asaslan'ghanda, sot, rabiye qadir xanimning qahar abduréhim we alim abduréhim isimlik ikki perzenti üstidin échilghan bolup, mezkür sotqa hökümet teripidin 20 kishi , rabiye qadirning a'ile tawabatliridin we rabiye qadir soda sariyidiki tijaretchiler wekilliridin bolup jem'iy alte adem qatnashqan.

Rabiye qadir xanim xitay türmisidin qoyup bérilgendin kéyin, amérikigha kélip, Uyghurlarning kishilik hoquqini qolgha keltürüsh yolida heriket élip barmaqta, emma xitay démokratik ellerning prinsiplirigha uyghun halda pa'alyet qiliwatqan rabiye qadir xanimni türlük betnamlar bilen eyiblepla qalmastin, uning perzentlirini qanunsiz tijaret qilghan hemde baj tölimigen dégen'ge oxshash jinayetler bilen qarilap, qahar abduréhim, alim abduréhim, ablikim abduréhimlarni qolgha élip, qizi roshen'gül abduréhimni nezerbend astida 24 sa'et közetmekte.

Xewerlerge qarighanda, xitay saqchiliri yene, rabiye qadir xanimning qérindashliridin memet qadirni soraqqa tartish bilen birge jismaniy jehettin qattiq xorlighan . Xitayning bu xil qilmishliri, nöwette xelq'ara kishilik hoquq teshkilatlirining küchlük eyibleshlirige uchrimaqta. (Eqide)