Уйғур паалийәтчиси рабийә қадир қоюп берилди


2005-03-17
Share

Атақлиқ уйғур кишилик һоқуқ паалийәтчиси рабийә қадир ханим.

Атақлиқ уйғур кишилик һоқуқ паалийәтчиси рабийә қадир пәйшәнбә күни муддәттин бурун қоюп берилип, америкиға қарап йолға чиқти.

Униң қоюп берилиши дәл америка ташқи ишлар министири кондилиза райисниң хитай зияритиниң һарписиға тоғра кәлгән. Кондилиза райис зияритиниң муһим бир күнтәртиби хитайниң кишилик һоқуқ хатириси иди.

Мәлуматларға қариғанда, рабийә қадир америка дипломатийә хадимлириниң һәмралиқида пәйшәнбә күни чүштин кийин бейҗиң вақти саәт алтиләрдә, америка бирләшмә авиатсийә ширкитиниң айрупиланиға чүшүп, бейҗиңдин йолға чиққан. У,вашингтон вақти кәч саәт 8 ләрдә вашингтондики хәлқара риган айрудромиға йитип килиду.

Уйғур хәлқиниң қәһриман аниси дәп нам алған рабийә қадир ханим 1999 - йили 8 - айда, уйғур елини зиярәт қилған америка дөләт мәҗлиси әзалири билән көрүшүшкә маңғинида қолға елинған. Хитай һөкүмити уни "дөләт мәхпийәтликини ашкарилаш җинайити" билән әйипләп, 2000 - йили 3 - айда сәккиз йиллиқ қамақ җазасиға һөкүм қилған. Өткән йили хитай һөкүмити йәнә униң қамақ җазасини бир йил йиникләткән иди.

Америка һөкүмити рабийә қадирниң қолға елинишиға йеқиндин көңүл бөлүп, униң қоюп берилишини америка- хитай кишилик һоқуқ сөһбәтлириниң муһим темилириниң бири қилған. Хитай һөкүмитиниң уни сиртта давалиниш үчүн, муддәттин 17 ай бурун қоюп бериши хәлқара җәмийәтниң қизғин қарши елишиға еришти.

Дуня уйғур қурултийи бу мунасивәт билән баянат елан қилип, хитай һөкүмитиниң, америка вә ғәрб әллириниң бесими астида рабийә қадирни қоюп бәргәнликини қарши алди. Бирақ, дуня уйғур қурултийи йәнә , рабийә қадирниң қоюп берилишиниң уйғурларниң кишилик һоқуқ мәсилисиниң һәл болғанлиқидин дерәк бәрмәйдиғанлиқини билдүрүп, ғәрб әллирини давамлиқ түрдә уйғурларниң кишилик һоқуқини яхшилаш үчүн хитай һөкүмитигә бесим ишлитишкә чақирди. (Арзу)

Сидиқ һаҗи рози, рабийә қадирниң қоюп берилиши мунасивити билән обзор елан қилди

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт