Uyghur pa'aliyetchisi rabiye qadir qoyup bérildi

Ataqliq Uyghur kishilik hoquq pa'aliyetchisi rabiye qadir xanim.

Ataqliq Uyghur kishilik hoquq pa'aliyetchisi rabiye qadir peyshenbe küni muddettin burun qoyup bérilip, amérikigha qarap yolgha chiqti.

Uning qoyup bérilishi del amérika tashqi ishlar ministiri kondiliza rayisning xitay ziyaritining harpisigha toghra kelgen. Kondiliza rayis ziyaritining muhim bir küntertibi xitayning kishilik hoquq xatirisi idi.

Melumatlargha qarighanda, rabiye qadir amérika diplomatiye xadimlirining hemraliqida peyshenbe küni chüshtin kiyin béyjing waqti sa'et altilerde, amérika birleshme awi'atsiye shirkitining ayrupilanigha chüshüp, béyjingdin yolgha chiqqan. U,washin'gton waqti kech sa'et 8 lerde washin'gtondiki xelq'ara rigan ayrudromigha yitip kilidu.

Uyghur xelqining qehriman anisi dep nam alghan rabiye qadir xanim 1999 - yili 8 - ayda, Uyghur élini ziyaret qilghan amérika dölet mejlisi ezaliri bilen körüshüshke mangghinida qolgha élin'ghan. Xitay hökümiti uni "dölet mexpiyetlikini ashkarilash jinayiti" bilen eyiplep, 2000 - yili 3 - ayda sekkiz yilliq qamaq jazasigha höküm qilghan. Ötken yili xitay hökümiti yene uning qamaq jazasini bir yil yinikletken idi.

Amérika hökümiti rabiye qadirning qolgha élinishigha yéqindin köngül bölüp, uning qoyup bérilishini amérika- xitay kishilik hoquq söhbetlirining muhim témilirining biri qilghan. Xitay hökümitining uni sirtta dawalinish üchün, muddettin 17 ay burun qoyup bérishi xelq'ara jem'iyetning qizghin qarshi élishigha érishti.

Dunya Uyghur qurultiyi bu munasiwet bilen bayanat élan qilip, xitay hökümitining, amérika we gherb ellirining bésimi astida rabiye qadirni qoyup bergenlikini qarshi aldi. Biraq, dunya Uyghur qurultiyi yene , rabiye qadirning qoyup bérilishining Uyghurlarning kishilik hoquq mesilisining hel bolghanliqidin dérek bermeydighanliqini bildürüp, gherb ellirini dawamliq türde Uyghurlarning kishilik hoquqini yaxshilash üchün xitay hökümitige bésim ishlitishke chaqirdi. (Arzu)

Sidiq haji rozi, rabiye qadirning qoyup bérilishi munasiwiti bilen obzor élan qildi